Хүн төрөлхтөн элдэв сонин зүйл туршиж, түүгээрээ түүхэн дээд амжилтыг хэмжиж Гиннессийн номд бичиж ирсэн. Гиннессийн ном анх 1955 оны наймдугаар сарын 27-ны өдөр Лондон хотноо хэдхэн мянган хувиар хэвлэгдэж байсан түүхтэй. Өдгөө энэ ном  дэлхий нийтийн хүртээл болж уг номыг олж авах, бүртгүүлэх сонирхолтой хүмүүс улам өссөөр байна.

     Тэгвэл тус номонд Зэвсэгт хүчний 327 дугаар ангийн Зенит, артиллерийн батарейны сум зөөгч, жолооч ахлагч С.Батцэнгэл 1111 удаа “сонс” эргэснээр дээд амжилтыг тогтоож, Гиннессийн номд бүртгэгдээд байна.

        Ахлагч С.Батцэнгэл нь сонс эргэлтээс гадна холын зайн гүйлтээр хичээллэж, Монгол Улсын дээд амжилтуудыг тогтоож байсан тэргүүний цэргийн алба хаагч билээ. Бид түүнийг энэ удаагийн түүчээ буландаа урин ярилцлаа.

-Сайн байна уу. Дэлхийн дээд амжилтыг эзэмшиж, Гиннессийн номонд бичигдсэнд баяр хүргэе. Манай уншигчдад өөрийгөө танилцуулаач?

            -Намайг Соёл-Эрднэнийн Батцэнгэл гэдэг. Дорнод аймгийн Хэрлэн суманд төрж, өссөн, айлын ганц хүү. 2013 онд Дорнод аймгийн тавдугаар сургуулийг төгссөн. 2013 оноос хойш Зэвсэгт хүчний 327-р цэргийн ангийн ахлагчаар ажиллаж байна.

-Гиннесст бүртгэгдсэн гэдгээ хэзээ мэдсэн бэ. Албан ёсоор баталгаажсан байгаа юу?

             -Наймдугаар сарын 9-нд албан ёсоор бүртгэгдсэн гэдгээ мэдсэн. Цаг хугацаагаа зарцуулж, маш их хөдөлмөр, тэсвэр тэвчээр гаргасан болохоор бүртгэгдсэн тухайгаа мэдээд хөл газар хүрэхгүй баярласан.

-Гиннесст хэрхэн бүртгэгдсэн түүхээсээ хуваалцаач. Хэдэн жил турникээр хичээллэж байна вэ?

     -Цэргийн албанд ороод л турникээр хичээллэж эхэлсэн дээ. Хамт алба хааж байсан найз минь “сонс” маш эргэдэг байсан. Түүнийг  нь хараад  адилхан эргэж сурахыг хүсч, бэлтгэлээ хамт хийж эхэлсэн. Би хөнгөн атлетикийн спортын ОУХМ цолтой гадаадын тэмцээнүүдэд байнга явдаг байсан болохоор турниктээ  тууштай олон цагийг зарцуулж чаддаггүй байлаа. Хөл хорионы үеэр “youtube” үзэж байгаад энэ төрлөөр геннисийн амжилт тогтоож болдог гэдгийн мэдэж авсан. Тэгээд гэрийнхээ грашийг турник  эргэж болохоор өндөр болгож засаад бэлтгэлээ хийж эхэлсэн дээ.

-Гиннессийн номонд бүртгүүлэх бэлтгэлээ хэр хугацаанд хийв?

       -2021 оны арван нэгдүгээр сард бэлтгэлээ хийж эхэлсэн. 2023 оны гуравдугаар сарын 18-нд  анхны сорилоо хийсэн.Тэгээд зургадугаар сарын 30-нд генниссийн хороонд явуулах албан ёсны бичлэгээ хийж, материалаа бүрдүүлж эхэлсэн. Материалаа явуулах гэсэн бичлэг маань яагаад ч юм явахгүй байсан. Тэгээд энэ худлаа боллоо гээд эхнэртэйгээ яриад сууж байтал болчихсон. Тэгээд бөөн баяр болсон доо.

-Тасралтгүй 37 минутын турш 1111 удаа эргэхэд хэр хүндрэлтэй байсан бэ?

            -Өдөрт зургаан удаагийн давтамжтай бэлтгэлээ хийдэг байсан.  Эргэлтийн бэлтгэлийн хажуугаар амьсгаагаа зөв авах, хуваарилах, биеийн тэнцвэрт байдлаа хадгалах дасгалуудыг хийнэ. Мөн нойр, хооллолтоо сайн зохицуулсан. Тийм учраас эргэхэд хүндрэлтэй зүйл байгаагүй.

-Хэзээнээс цэргийн хүн болъё гэж бодсон бэ? Яагаад энэ мэргэжлийг сонгосон юм бэ?

      -Арван жилийн сургуулиа төгсөөд яагаад ч цэрэг алба сэтгэлийг минь татсан даа. Цаг хугацаа дэндүү хурдан юм аа, нэг л мэдэхэд есөн жил ажилласан байна. Гиннест бүртгүүлэх болсон шалтгаан минь энэ албатай хамаатай. Монгол цэрэг, дэлхийн цэрэг гэдэг шүү дээ. Би үүнийг л батлан харуулахыг хүссэн. Энэ амжилт минийх гэхээс илүүтэй монгол зэвсэгт хүчний салбарынх гэж хэлмээр байна.

-Таны бодлоор цэргийн алба хаагч байхын сайхан тал нь юу вэ?

            -Бид чинь эх орны хүүхдүүд шүү дээ. Залуу нас, эрч хүч тэр бүх зүйлээ эх орныхоо төлөө зориулна гэдэг миний хувьд нэр төрийн хэрэг. Зарим хүмүүс цэргийн албыг хатуу чанга, хэцүү гэдэг ч би албаараа Монголын зэвсэгт хүчнээр үргэлж бахархдаг.