“Абу Дабигийн дуулга” тэмцээнд Монголын тамирчид чансаагаа сорьж, медалийн хур буулгасан өдрүүд өнгөрч байна. Бид энэ удаагийн “Түүчээ” буландаа жүдогийн 100 килограммын жинд барилдаж, алтан медаль хүртсэн Олон улсын хэмжээний мастер О.Цэцэнцэнгэлийг урилаа. Тэрбээр Хил хамгаалах ерөнхий газар Хилчин спорт хороо, Женко клубийн тамирчин. Түүний аав нь Улсын начин Б.Одхүү бөгөөд 18 настайдаа аавыгаа даган үндэсний бөхөөр барилдаж, аймгийн заан цол авч байсан түүхтэй. Харин өдгөө 22 настайдаа тэр “Их дуулга” тэмцээний аварга боллоо. Тэрбээр “Энэ оны сүүлийн тэмцээнд түрүүлж, 1000 оноо авч чансаагаа ахиулсандаа баяртай байна” хэмээн тун даруухнаар сэтгэгдлээ илэрхийлснээр бидний яриа эхэлсэн юм.

-Жүдогоор хэзээнээс хичээллэж эхэлсэн бэ?

  -Жүдогоор хичээллээд арван жил болж байна. Аав, ээж хоёр маань жүдо бөхөөр барилддаг байсан. Тэгээд аавыгаа дагаад жүдогийн шигшээ багийн бэлтгэл дээр  очих бүртээ аав шигээ бөх болно гэж боддог байсан. Тэгээд  2012 онд жүдогоор хичээллэж эхэлсэн. Өөрийн сонирхож, хүсэж зорьсон зүйлдээ амжилт гаргах тусам урам авдаг юм билээ. Анхны тэмцээндээ орж, медаль аваад цаашид улам олон тэмцээнд оролцох хүсэл төрсөн.

-Энэ хугацаанд тэмцээний олз омог арвин байх?

  -Мэдээж арван жилийн хугацаанд олон тэмцээн уралдаан оролцсон. Эдгээрээс амжилттай оролцох нь бий, алдсан зүйл ч бий. Томоохон амжилтаасаа дурдвал, Залуучуудын ази, номхон далайн аварга болж байсан. Мөн 2016 онд жүдогийн Улсын аварга шалгаруулах тэмцээний 90 килограммын жинд хүрэл медаль, Ази тивийн залуучуудын аварга шалгаруулах тэмцээнээс 2017 онд мөн хүрэл медаль хүртсэн.

-Тэмцээнд бэлтгэл хамгийн чухал шүү дээ. Хэрхэн бэлтгэлээ хийсэн бэ?

-Улсын шигшээ багт байнгын бэлтгэлтэй байдаг болохоор тэмцээнд тусгайлан бэлтгэл хийгээгүй. Ер нь тэмцээнд орохдоо гэхгүй,  тамирчин хүн байнгын бэлтгэлтэй байж, амжилт гаргадаг. Бэлтгэлээ нэг өдөр тасалж болдоггүй. Хэрэв байнгын бэлтгэл сургуулилтаа тасалвал, жин, нормоо алдах эрсдэлтэй.

-Өөрийгөө түрүүлнэ гэх бодож байв уу. Хүн нэг мэдрэмж байдаг шүү дээ?-

-Ямар ч тэмцээнд амжилт үзүүлж, цаашид түрүүлэхийн төлөө оролцох нь тамирчин хүний гол зорилго. Энэ ч утгаар энэ удаагийн Абу Дабигийн тэмцээнд ч мөн түрүүлэхийг зорьж орсон. Зорилгоо биелүүлж, түрүүлсэндээ баяртай байна.

-Өрсөлдөгчөөсөө айж байсан тоглолт бий болов уу?

-Өрсөлдөгчөөсөө айна гэдэг тамирчин хүнд байж болохгүй зүйл. Жүдо бол нэг талаараа халз тулааны спорт. Бид өрсөлдөгчийнхөө ямар мэх хийх, ямар арга барилаар барилдахыг нь судалж барилддаг. Сайн судалгаа, анхаарал төвлөрөлт байхад өрсөлдөгчийг ялах боломжтой. Түүнээс айж, эмээх юм бол шууд ялагдана гэж боддог. Багш нар маань ч тэгж заадаг.

-Тамирчин хүнд сэтгэлзүй маш чухал. Сэтгэлзүйгээ хэрхэн бэлтгэдэг вэ?

-Бэлтгэл сургуулиа чанартай сайн хийж, өөрийгөө ялж чадвал тэр өөрөө сэтгэлзүйгээ ялах нэг хэлбэр гэж ойлгодог. Түүнээс биш бэлтгэлээ таслах юм уу, цагаасаа хоцрох зэрэг өөрөөс шалтгаалах жижиг үйлдлүүддээ ялагдах юм бол бэлтгэлээ сайн хийж чадахгүй, юун тэмцээнд амжилттай оролцох манатай болно. Тиймээс эхлээд өөрөө өөрийгөө ялж, дараа нь тэмцээндээ ялдаг.  Миний хувьд ялна гэхээс илүүтэй сайн барилдаан үзүүлэхийг хичээдэг.

-Цаашдын зорилгоосоо бидэнтэй хуваалцвал?

-Он гараад хуваарьт тэмцээнүүдэд оролцоод явах байх. Цаашид мэдээж амжилтаа улам ахиулж, улам олон тэмцээнд оролцон, Монголынхоо нэрийг гаргахыг зорьж байна.

Өрсөлдөгчөөсөө айна гэдэг тамирчин хүнд байж болохгүй зүйл. Жүдо бол нэг талаараа халз тулааны спорт. Бид өрсөлдөгчийнхөө ямар мэх хийх, ямар арга барилаар барилдахыг нь судалж барилддаг. Сайн судалгаа, анхаарал төвлөрөлт байхад өрсөлдөгчийг ялах боломжтой. Түүнээс айж, эмээх юм бол шууд ялагдана гэж боддог