Э.Билэгсайхан бусдын адил хөдөлмөрлөж, хичээж, зүтгэж яваа нэгэн. Тэрбээр хэдхэн хоногийн өмнө их сургуулиа амжилттай төгсөж, мянга мянган залуусын бодит үлгэрлэл болсон билээ. Тэмцэгч, гал "сөрөгч" Э.Билэгсайханыг "Түүчээ" буландаа урьж, ярилцлаа.

-Сургуулиа амжилттай төгссөнд нь баяр хүргэе. МҮИС-ийг ямар мэргэжлээр төгссөн бэ?

     -Баярлалаа. Би МҮИС-ийг Олон улсын харилцаа, англи хэл орон судлалаар суралцаж, энэ сарын 4-нд төгссөн. Намайг дэмжиж, ойлгож байсан багш нар, найз нөхөд, гэр бүлийнхэндээ  маш их баярлаж байна.

-Одоо мэргэжлээрээ ажиллаж байна уу?

      -Би багаасаа англи хэлтэй болох мөрөөдөлтэй байсан. Мөрөөдлийнхөө дагуу тус мэргэжлийг сонгосон. Хэл сурах нь цаашид өсөж, хөгжихөд хэрэгтэй шүү дээ. Оюутны дөрвөн жил адал явдалтай, сургамжтай, гунигтай, баяр, жаргалтай олон мэдрэмжээр хөглөгдөж сайхан өнгөрлөө. Их ч зүйл сурч, мэдлээ. Оюутан болоод цаг барьж, аливаад хариуцлагатай хандаж сурлаа. Мөн харилцааны чадвар сайжирч, хүмүүстэй амархан ойлголцдог болсон доо. Одоо би  “М-Си-Эс” группэд нийгмийн ажилтнаар ажилладаг.

-Чөлөөт цагаараа юу хийх дуртай вэ?

      -Чөлөөт цагаараа ном уншиж, подкаст сонсож, найзуудтайгаа уулзаж, видео тоглоом тоглодог. Тэгээд өөрт сонирхолтой санагдсан бүхнээ үздэг дээ.

-Сургуулийн багш нар, оюутнууд чамтай хэрхэн харьцдаг байсан бэ?

     -Зарим багш нар надтай яаж, хэрхэн харьцахаа мэддэггүй байсан. Олон найзтай болохоор тэд маань намайг ойлгож, дэмждэг. Түүнд нь их баярладаг.

-Чи хэдүүлээ амьдардаг вэ. Аав, ээж нь юу хийдэг вэ?

     -Би ам бүл зургуулаа амьдардаг. Би нэг эгч, нэг дүүтэй. Би айлын ихэр хүүхэд. Аав минь төслийн удирдагч мэргэжлээр ажилладаг. Ээж минь мэдрэлийн эмч мэргэжилтэй.

-Чи ямар мөрөөдөлтэй вэ. Мөрөөдлийнхөө төлөө юу хийж, хэрхэн ажилладаг вэ?

     -Би сайхан гэр бүлтэй болж, дуртай зүйлээ хийж амьдрахыг хүсдэг. Мөн залуус, дүү нартаа зөв бүхнийг түгээж, тэднийхээ түүчээ болох юм сан гэж боддог. Мөн аав, ээждээ эд хөрөнгө өгч баярлуулахаас илүү элэг бүтэн, сайхан амьдарч тэднийгээ баярлуулах юм сан гэж хүсдэг. Би өөрийгөө хөгжлийн бэрхшээлтэй иргэн гэж боддоггүй. Өөрийгөө тэгж хэлүүлэх ч дургүй. Энгийн хүмүүсийн дунд ажиллаж, амьдарч байгаа болохоор би өөрийгөө энгийн иргэн гэж боддог шүү.

-Чиний аливааг сурах арга барил юу вэ. Чи өөрийгөө хэрхэн дайчилдаг вэ?

    -Би их шартай хүн. Чадахгүй зүйлээ ахин дахин хийж сурч байж санаа амардаг. Би хоёрдугаар дамжаанд байхдаа хичээлээ ойлгохгүй болохоор юу ч хиймээргүй санагдаж,  шантарч байсан. Тухайн үед  би өөрийгөө  ганцаараа биш гэдгийг мэдэрч, заавал хийж бүтээж, сурч мэдэх ёстой хэмээн бодож, бэрхшээлийг давж гарсан. Түүнээс хойш шантраагүй. Цаашид ч шантрахгүй байхыг хичээнэ.

-Цаг гарган ярилцсанд баярлалаа. Ажлын амжилт хүсье.

     Баярлалаа. Танай сайтын хамт олон ажлын амжилт хүсье.