ОХИДЫН ӨДРИЙГ ТОХИОЛДУУЛАН ОНЦЛОХ ТАВАН ШҮЛЭГ

2023-10-11, 1872

Олон улсын охидын өдөр тохиож байна. Тодруулбал, НҮБ-ын Ерөнхий Ассамблей жил бүрийн аравдугаар сарын 11-ний өдрийг "Олон улсын охидын өдөр" болгон тунхагласан бөгөөд дэлхийн 193 оронд энэ өдрийг тэмдэглэдэг байна. Эл өдрийн гол зорилго нь охидод тулгамдаж буй асуудлуудыг шийдвэрлэх, тэдний эрхийг хамгаалах, боловсрол эзэмшүүлж, хөгжүүлэхэд нь анхаарал хандуулах, охидын эрхийн талаарх олон нийтийн ойлголтыг нэмэгдүүлэхэд оршдог аж. Охидын өдөрт зориулан онцлох таван шүлгийг хүргэж байна.

Охидын уянга

Зуны хөндийг дүүргэсэн

Цэцгийн далай долгиллоо

Зургийн хуар шиг охид минь

Цэнгэлийн бүжиг бүжээрэй

Ай хө зээ хө

ай хө зээ хө

Зургийн хуар шиг охид минь

Цэнгэлийн бүжиг бүжээрэй

Уудам талыг баясгасан

Яруу хөгжим эгшиглэлээ

Уран гоолиг охид минь

Ялдам дуулан бүжээрэй

Ай хө зээ хө

ай хө зээ хө

Уран гоолиг охид минь

Ялдам дуулан бүжээрэй...СГЗ, Ж.Бадраа

***

Намрын шөнө голын эрэг дээр охиноо хөтлөн зогсном

Надад усны сэрүүн амьсгал нэгийг бодогдуулах авч

Жижиг навч шиг охины минь халуун алга

Жил сараас авч үлдсэн өөрийн ганц амь ажээ...Яруу найрагч О.Дашбалбар

***

Модод нь зузаалж охид нь нимгэлээд

Монголын сууринд хавар ирнэ

Хөгшдийн гар шиг тэнгэрт сарвайсан моддын мөчрөөс

Хөхний товч шиг жимсхэн цухуйгаад

Охидын хөөрхөнд санаа нь зовсон шүлэгч

Ойн сиймхийгээр тэднийг ажин санаа алдах

Охь дарсыг ийм үед хүртэх хэрэггүй ээ

Охид нь өөрсдөө согтооно... Болор цомын эзэн, яруу найрагч Б.Мягмаржав

***

Охин үрээ хайрла!

Омогдож загнахдаа ч хайрла!

Охин үрээ хайрла!

Ойворгон зэмлэхдээ ч хайрла!

Нар ханын толгойд буухад хааяа нэг сэрэг, бүү зэмлэ

Насаараа тэр чинь өглөө босох хүн, төрсөн гэртээ л нойр аваг

Нар шингэж үдшийн хар чийг унатал найз нартайгаа дуулалдаг

Насаараа тэр чинь айлын голомт манаж морин төвөргөөн хүлээнэ

Энхрий гарын нь хурууг чилтэл гэр зуураа зарахдаа

Ээжийн цай уулгаж, аавын үгээр энхрийл

Эцгийн гэрээс гармагц эрийн гарт нухлагдана

Харийн газар одож хадмын нүүрийг царайчилна

Насаараа уухгүй амтат цайг нялх багад нь гэрт нь уулга

Насаараа амсахгүй жаргалыг нялх багад нь тоонотод нь эдлүүл

Насаараа сонсохгүй энхрий үгийг нялх багад нь гамнахгүй хэл

Насаараа нууж урсгах гашуун нулимсыг нь бодож цөөн уйлуул, охин үрээ!

Хүний гэргий болох гэж гангар шаазан шиг хагарна

Хүүхэн хонгор үрээ гарын алгандаа энхрийл

Хүй орчлонгийн жамтай тэнцүүлж түүнээ хайрла

Хөөрхөн хонгор аалинд нь эрхлүүлж түүнээ хайрла

Үрийн эх болох гэж алтан заадал сална

Үүлэн хонгор үрээ тэнгэрийн мандалдаа эрхлүүл

Үйл нь дуусдаггүй хорвоод балчирт нь амжиж жаргаа

Үс гэзгээ цайтал өнөд шаналахыг нь болгоо

Зөөлөн булбарай хурууг нь зүү утастай шадарлуул

Зүйдэл оёдлын хорвоод охин үр чинь төрснийг сана

Зөөлөн хонгор аашийг нь зүйр үгтэй шадарлуул

Зөвлөх хэлцэхийн хорвоод охин үр чинь төрснийг сана

Арван жил зэмлээд ч ухааруулж амжаагүй үгийг чинь

Анхны үр ньтөрөөд үдшийн шөнөдөө ухааруулна

Хорин жил дуудаад сэрээж чадаагүй нойрыг нь

Хонгор үр нь төрөөд үүрийн жавраар ч хулжаана

Охин үрээ энхрийл, орчлонгийн зовлонд цадахын цагтаа

Огшуун нулимсандаа живэхийн цагтаа хожмоо нэг дурсана

Аавын гэрт жаргасан даа гэж хэзээд нэг тайтгарна

Ээжийн өвөрт эрхэлсэн дээ гэж эрхгүй нэг уужирна

Охин үрээ хайрла хясаа сувдаа нуудаг шиг хайрла

Охин үрээ хайрла үүл усаа хураадаг шиг хайрла

Охин үрээ хайрла уул эрдэнээ нуудаг шиг хайрла

Охин үрээ хайрла ус загасаа цэнгүүлдэг шиг хайрла

Хатуугаас хатуу үгийг ханатлаа үр чинь сонсоно

Хавраас намар хүртэл төрхөмдөө очиж хэлэх үү?

Хайртай охиноо зэмлэхдээ харцаараа ч болов энхрийл

Хаврын шувууд шиг намрын жимс шиг үгийг охиндоо хэл

Бусдыг хайрлах л гэж төрсөн юм охин үрээ энхрийл

Буцаж урсдаг ус байхгүй, эргэж та нарыг хайрлахгүй

Эргүүлэгт орчлон харин охин үрийг чинь хайрлахгүй

Энгэсэгт хацраар гэрэлтэвч зовлон нь та нарт харагдахгүй

Үндэс нь газарт цэцэг нь тэнгэрт

Үүн лүгээ адил санаж охин үрээ хайрла

Тэнгэрт чинь нар ч бий хур ч бий аянга ч бий

Тэнгэрлиг охин үрийг чинь жаргал ч тосно зовлон ч тосно

Хөөрхий түүнийг нялхад нь жаргаа

Хүүрнэн сургаад яах вэ дээ орчлон түүний багш юм

Хүний л гарт очих бүсгүй түүнийг энхрийл

Хүний л эрхэнд жаргах охин үрээ хайрла… Яруу найрагч Б.Энхтуяа

***

Сайхнаа мэддэггүй сайхан охидод би дуртай.

Сайлсан ч, муулсан ч үл тоох сэтгэл тэдэнд л байдаг.

Сансрын салхи шиг нууцыг нь би л мэддэг учраас

сайхнаа мэддэггүй сайхан охид надад дургүй...Яруу найрагч Д.Нямдорж

ОХИДЫН ӨДРИЙГ ТОХИОЛДУУЛАН ОНЦЛОХ ТАВАН ШҮЛЭГ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.