Жүжигчин, найруулагч Б.Амарсайхан Chicago Asian Pop-Up Cinema-н “Pinnacle Career Achievement Awardee”-н эзэн болжээ. Тодруулбал,  АНУ-ын Чикаго хотноо 15 дахь удаагаа зохион байгуулж байгаа кино наадмаас “Карьерын оргил амжилт” шагналыг Монголоомс анх удаа хүртсэн байна.

   Түүнд шагнал олгосон тус фестивалийн үүсгэн байгуулагч София Фон Бочиа “Кино урлагт 24 жил ажиллахдаа Монгол Улсаас анх удаа Netflix-н "Марко Поло" цувралд дүрээ гаргаж, Монгол төдийгүй Азийн кино урлагт оруулсан хувь нэмрийг нь өндрөөр үнэлэн энэхүү шагналыг олгох болсондоо баяртай байна. Түүний найруулагчийн анхны бүтээл “Эргэж ирэхгүй намар” киноноос монгол сүнс мэдрэгдсэн, гайхалтай кино болсонд баяр хүргэе” гэж онцолжээ.

      Харин Б.Амарсайхан “Монгол хүн байж, өөрсдийн ялгарал, онцлогоо кино урлагаар дамжуулан сурталчилж, энэ салбарт 24 жил тууштай зүтгэж, хойшид мөн зүтгэхийг минь үнэллээ” гэжээ. Мөн тэрбээр одоо “Орлон тоглогч” нэртэй 16 ангитай киноны найруулагчаар ажиллаж байгаа бөгөөд тус киноны гадаад дахь зураг авалтыг  Чикаго дахь  CSproduction-тай хамтран хийсэн байна. Энэ нь Монголын кино урлагийн түүхэнд анх удаа АНУ-д албан ёсны зөвшөөрөл авч зураг авалт хийсэн тохиолдол болсон байна.