“Х-Түц” продакшны жүжигчин Т.Бархүүгийн төрсөн өдөр өнөөдөр тохиож байна. Тэрбээр Нийслэлийн 13 дугаар сургуулийг төгсөж, төгссөн жилээ Испанийн эдийн засгийн сургуульд орсон ч жүжигчний мэргэжлийг сонгодог гэдэг. Багаасаа дуулах дуртай байсан тэрбээр дуулах хүсэл мөрөөдлөө даган урлагт хөл тавьсан нь жүжигчний мэргэжлийг сонгох суурь болжээ. Сургуулиа төгсөөд Х-Түц продакшны  “Сэргээш-3”-т тоглосон хошин урлагт орох эхлэл болжээ.

             Үүнээс хойш тус продакшны тулах нэгэн багана болж олон уран бүтээлд өөрийн авьяас, ур чадварыг харуулсныг үзэгчид андахгүй. Тайзнаас гадна “Миний хөрш чөтгөр”-өөс эхлээд хайр дурлалын уран бүтээлд ч чамгүй ажилласан. Түүний тайзнаа гаргасан дүрээс онцолж дурдвал 2020 онд тоглосон “Фауст” жүжгийн Мефистофлийн дүр юм. Түүний хувьд өөрийн авсан дүр, оногдсон уран бүтээлдээ гүн орж, нямбай ажилладаг уран бүтээлч бөгөөд Фауст жүжгийн эл дүр нь өөрийн доторх чөтгөр, бурхныг хоёуланг нь гаргасан, уран бүтээлчийн хувьд илүүтэй ур чадвар шаардсан дүр байсныг онцолж байв.   

             Тэрбээр манай сайтад өгсөн ярилцлагадаа “Уран бүтээлч хүн үзэгчдийнхээ алга ташилтад баярлана. Сэтгэлээ ташиж байгаа, өрөвдөн хайрлаж байгаа, баяр хүргэж байгаа нь мэдрэгддэг шүү дээ. Тэр байтугай мянган хүний өмнө гарч ирэхэд намайг ямар нүдээр харж байна вэ, намайг хэрхэн үнэлж байна вэ гэдэг нь хүртэл мэдрэгдэнэ. Уран бүтээл маань үзэгчдэд хүрч, биднийг үнэлбэл энэ бидний бахархал юм. Үнэхээр бүтээл маань бүтээл болж, тэр хүний сэтгэлийг хөдөлгөж, алмайруулж, бишрэх, хайрлах, уйлах мэдрэмж өгч, инээлгэж, гэр бүлийн үнэ цэн эсвэл хайртай учрах тэр сайхан мэдрэмжийг бүтээлээрээ өгөхөд л бидний үнэн цэн оршино” гэсэн. Үнэхээр ч тийм сайхан мэдрэмжийн дунд өдгөө хүртэл тууштай алхаж, бүгдийг нь мэдэрч, өнөөдөр ч уран бүтээлээ хийсээр явна.