Найруулагч П.Лхагвадуламын "Сэр сэр салхи" бүтээл олон улсын кино наадмаар нээлтээ хийнэ

2023-08-17, 892

Монгол кино анх удаа 80 дахь удаагийн Венецийн олон улсын кино наадмаар дэлхийд нээлтээ хийхээр болжээ. Тодруулбал, 2023 оны долдугаар сарын 25-ны өдөр 80 дахь удаагийн Венецийн Олон Улсын Кино Наадмын захирал Алберто Барбера тус наадмын Оризонти уралдаант хэсэгт Монгол найруулагч Пүрэв-Очирын Лхагвадуламын “Сэр сэр салхи" бүрэн хэмжээний уран сайхны киног сонгож буйг дэлхий нийтэд зарласан билээ. Дэлхийн А зэрэглэлийн кино наадмын нэгд зүй ёсоор тооцогддог Венецийн Олон Улсын Кино Наадамд анх удаа Монголын найруулагчийн бүтээл албан ёсны хөтөлбөрт сонгогдон, наадмын дээд шагнал болох алтан арслангийн төлөө өрсөлдөх эрхтэй болсон нь Монголын кино урлагийн түүхэнд тэмдэглэгдэн үлдэх үйл явдал юм.

Найруулагч П.Лхагвадулам нь кино урлагийн мэргэжлийн нэр хүндтэй "Screendaily" сэтгүүл 2023 онд хамгийн их хүлээлттэй 18 залуу найруулагчийн нэгээр шалгарсан юм. Мөн “Есдүгээр сарын цас” богино хэмжээний киногоороо 2022 оны Венецийн ОУКН-ын шилдэг богино хэмжээний “Алтан Арслан” шагналыг хүртсэн анхны Монголын уран бүтээлч болж байсан.

Тус киног Монголын Гуру Медиа, Францын Аврора Филмз, Португалын Uma Pedra nо Sapata, Голландын Volya Films, Германы 27 Films, Монголын Мобинетийн VOO компаниуд хамтран Монгол, Франц, Португал улсуудын Үндэсний Кино Урлагийн Зөвлөлийн тэтгэлэгүүд болон Берлин, Локарно, Доха, Роттердам ба Торино зэрэг олон улсын кино наадмын дэргэдэх сангууд болон Францын АРТЕ ТВ-ийн сувгийн дэмжлэгээр бүтээсэн.

Киноны зураг авалтыг 2022 оны есөөс арванхоёрдугаар сар хүртэл Улаанбаатар хотноо зохион байгуулсан бөгөөд зураг авалтанд Монгол, Франц, Португалийн нийт 80 гаруй уран бүтээлчид ажиллан, 200 гаруй гол ба туслах дүрүүд, олны хэсгийн жүжигчид, урлагийн сургуулийн оюутан оролцон тоглосон. Тус киноны гол дүрд залуу жүжигчин Б.Тэргэл, А.Номин-Эрдэнэ нар тоглож, Ардын жүжигчин Г.Мягмарнаран, жүжигчин Ц.Ганзориг, Н.Цэнд-Аюуш, Ч.Булган нар туслах дүрийг чадамгай бүтээсэн бол ерөнхий зураглаачаар Португалийн Вашко Виана, Ерөнхий зураачаар Монголын Н.Болор-Эрдэнэ, хөгжмийн зохиолчоор Португалийн Вашко Мэндонса, Гэрэл, техникийн багийн ахлагчаар Б.Түвшинтөгс, Монгол талын ерөнхий продюсерээр Гуру Медиа студийн продюсер Ц.Ариунаа, гүйцэтгэх продюсераар мөн студийн продюсер Х.Оюундарь нар тус тус ажилласан.

Найруулагч П.Лхагвадулам одоо Португалийн Лиссабон хотын Лусофона Их Сургуульд кино зохиолын чиглэлээр докторын зэрэг горилж байгаа бөгөөд тэрбээр "Сэр сэр салхи" бүтээлийнхээ талаар "Энэ кино нь өвөг дээдэс, онгод тэнгэрийн ерөөл болон бүдэг бадаг ирээдүйн дунд өөрийгөө хайсан залуу зайрангийн эгэл түүх юм. Энэхүү бүтээлээрээ нэг талаас өнөөдрийн Монголын маш хурдацтай өөрчлөгдөж буй нийгэмд залуу хүн хэрхэн Монголын соёлын нэг хэсэг болох бөөгийн соёлыг тээнгээ өсч, сурч, амьдарч буйг харуулахыг зорьсон. Нөгөө талаараа орчин үеийн Монголын нийгмийн олон талт байдал, зөрчлийг гаргах гэхээсээ илүү янз бүрийн амьдралын түүхээр дамжуулан Монголын нийгмийн нийлмэл дүр төрхийг өгүүлэхийг хичээсэн" гэв.

Найруулагч П.Лхагвадуламын "Сэр сэр салхи" бүтээл олон улсын кино наадмаар нээлтээ хийнэ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.