Арабын Нэгдсэн Эмират Улсын Абу Даби хотод энэ сарын 24-26-ны өдрүүдэд жүдо бөхийн “Их дуулга” тэмцээн болно. Тус тэмцээнд оролцох Монгол Улсын баг мэдүүлгээ өгсөн байна . Манайхаас дөрвөн тамирчин зодоглох мэдүүлэг өгсөн байсан боловч ОУХМ Л.Анхзаяа нэрээ татсан бололтой . Эрэгтэйчүүдийн 66 кг-д ОУХМ Б.Эрхэмбаяр, ОУХМ Г.Хэрлэн, 73 кг-ын жинд Л.Энхдөл нар оролцох мэдүүлэг өгсөн байна. Тус их дуулгад одоогийн байдлаар дэлхийн 83 орны эрэгтэй 296, эмэгтэй 179, нийт 475 тамирчин барилдах мэдүүлэг өгөөд байгаа юм.

        Манай тамирчин, ОУХМ Баттогтохын Эрхэмбаяр дэлхийн чансааны тавд эрэмбэлэгдэн 66 кг-ын жингийн бүх бөхчүүдийг манлайлан барилдана. Гүржийн Vazha Margvelashvili долоод,  Испанийн David Torne Garcia 13-д, Францын Daiki Douba дэлхийн чансааны 14-д эрэмбэлэгдэн Б.Эрхэмбаярын араас жагсаж байна. Харин ОУХМ Ганболдын Хэрлэн 64 эрэмбэтэй явна.