Капитрон банк 2023-2024 оны оюутны лигийн тэмцээнийг ивээн тэтгэж, “Капитрон оюутны лиг” нэрээр зохион байгуулан, ажиллаж байна. Тус лигийн нээлтийн арга хэмжээ өнөөдөр болж, Капитрон банкны гүйцэтгэх захирлын тэргүүн орлогч Б.Чандмань, Монголын оюутны сагсан бөмбөгийн холбооны ерөнхийлөгч О.Тэнүүн нар хамтын ажиллагаагаа өргөжүүлэх гэрээнд гарын үсэг зурлаа.

      Капитрон банк нь нийгмийн хариуцлагын хүрээнд урлаг, спортыг дэмжих бодлогынхоо дагуу ийнхүү оюутны лигийг ивээн тэтгэн оролцож байгаа юм. Оюутны сагсан бөмбөгийн лигт Монголын 30 гаруй их, дээд сургуулийн 50 орчим баг оролцохоор бүртгүүлээд байна.

       “Капитрон оюутны лиг”-ийн нээлтийн тоглолт ирэх сарын 4-ний өдөр “UG arena” спорт цогцолборт өнгөрсөн оны шилдэг дөрвөн багийн тоглолтоор эхэлнэ. Ингэснээр цаашдаа сонгогдсон долоон сургууль дээр лигийн тоглолт үргэлжлэх бөгөөд нийтдээ 450 орчим тоглолт болж, 2024 оны дөрөвдүгээр сард шилдгүүд тодорно.