Токиогийн олимпоос эхлэн олимпын наадмын хөтөлбөрт багтаад буй спорт авиралтын тэмцээн өнөөдөр эхэллээ. Нийт дөрвөн багц медалийн эзэд тодрохоос эрэгтэй, эмэгтэй хурдан авиралтын төрөл явагдлаа. Хоёр оролдлогын дараа шилдэг нэг цагийн үзүүлэлтээр нь тамирчдыг жагсаахад эмэгтэйчүүдээс Нямдоогийн Сэлэнгэ 15-р байр, эрэгтэйчүүдээс Сүхбаатарын Итгэл 24, Баттулгын Билгүүн 25 дугаар байр тус тус эзэллээ.

        Маргааш манай эрэгтэй баг буухиа төрөлд оролцох ба нийт 10 баг өрсөлдөх юм. Спорт авиралтын төрөлд Ази тивээс Индонезийн тамирчид дэлхийд дээгүүр өрсөлддөг бөгөөд үүнийгээ ч баталж энэ төрөлд дэлхийн рекордыг эзэмшигч Веддрик Леонардо 4,978 секундын амжилтаар урьдчилсан тэмцээнд тэргүүллээ. Тэрбээр нийт тамирчдаас ганцаараа таван секундээс дотогш амжилт үзүүлсэн. Эмэгтэйчүүдийг мөн л Индонезийн тамирчин, энэ оны дэлхийн аварга Десак Деви тэргүүллээ.