Монголын эмэгтэй волейболчид өнөөдөр Ази тивийг төлөөлөн дэлхийд өрсөлддөг хүчтэй багуудын нэг Тайланд Улсын багийн эсрэг өрсөлдлөө. “В” хэсгийн тэргүүн баг, Тайланд бүсгүйчүүд энэ онд нутагтаа зохион байгуулагдсан Азийн АШТ-д хүчирхэг Хятадын шигшээ багийг буулган авч, гурав дахь удаагаа Ази тивийн аварга болсон билээ. Энэ удаагийн наадамд Тайландын Азийн аварга болсон бүрэлдэхүүнээс хоёр тоглогч л ирээгүй буюу үндсэн шигшээ баг нь Ханжоуд ирээд байгаа юм.

          Хүчирхэг өрсөлдөгчийн эсрэг эхний үеийн тоглолт хүндхэн болж, 25:14-өөр дийлдсэн. Хоёрдугаар үед манай баг 25:20 буюу тун ойролцоо өрсөлдөөнийг үзүүлсэн. Харамсалтай нь, манай багийн тоглолт гуравдугаар үед эхний үеийн адил сайн болсонгүй, 25:12-ын харьцаатай өндөрлөлөө.

          Энэ тоглолтод манай багаас Ганболдын Энхнаран 13, Ган-Очирын Хонгорзул найман оноо авч, багаа тэргүүллээ. Энэ хэсгийг хоёр хожилтой Тайландын баг тэргүүлж, Тайвань удааллаа. Манай багийн хувьд Азийн наадмын 9-12 дугаар байрын төлөө “Н” хэсэгт өрсөлдөхөөр боллоо. Монгол Улсын шигшээ баг энэ сарын 4-ний өдөр Хонконг, энэ сарын 5-ны өдөр Афганистаны багтай тоглох хуваарьтай байна.