Монголын “Жүдо академи”-ийн гүйцэтгэх захирал, дасгалжуулагч Г.Бат-Эрдэнэ Япон Улсын Токио хотноо явагдсан “IJF” буюу Олон улсын жүдо бөхийн холбооны техникийн шалгалтаа амжилттай өгч Олон улсын дасгалжуулагчийн сертификатаа гардан авлаа. Ингэснээр Г.Бат-Эрдэнэ багш маань “IJF”-ээс зохион байгуулж буй Олон улсын тэмцээн, арга хэмжээнүүдэд эх орноо төлөөлөн дасгалжуулагчаар оролцох, Олон улсын клуб, байгууллагуудад ажиллах эрхтэй болж байгаа юм.

          “IJF” Academy болон Олон улсын олимпын хорооноос (ОУОХ) хамтран зохион байгуулсан энэ удаагийн курс нь дэлхийн жүдо бөхийн төв Кодокан Институтад есдүгээр сарын 25-30-ны өдрүүдэд явагдсан юм. Дасгалжуулагчдын Техникийн Курс хэмээн нэрлэгдсэн энэхүү шалгалтын үеэр дэлхийн өнцөг булан бүрээс цугласан дасгалжуулагчид жүдо бөхийн мэдлэг боловсрол, ур чадвараа “IJF” болон ОУОХ-ны мэргэжилтнүүдийн өмнө дүгнүүлж цэгнүүлдэг юм. Үүнээс өмнө дасгалжуулагчид 13 долоо хоногийн турш жүдо бөхийн түүх, философи, хөгжил, бүтэц, техник зэргийг багтаасан онлайн сургалтанд хамрагдаж мөн шалгалт өгч тэнцсэн байгаа.