Дэлхийн аваргын хүрэл медальт ОУХМ Т.Тулга 65 кг-ын жингийн эхний тойрогт Германи Улсын тамирчин Александр Семисоровыг 9:2-оор оноогоор ялсан. Харин наймны нэг шигшээд Азербайжан Улсын тамирчин олимпын мөнгө, хүрэл медальт, дэлхийн гурван удаагийн аварга алдарт Хажи Алиевтай тун эргэлзээтэй барилдааныг хийж шүүгчдийн 3:3 гэсэн шийдвэрээр ялагдал хүлээв.

        Манай тамирчин эхний үед 2:2 оноогоор хожсон. Харин шийдвэрлэх үеийн сүүлийн минутанд Хажи Алиевийг сугадаж дайрч дэвжээнээс гарган 1 оноо авч илүүрхлээ батлаж оноог 3:2 болгосон. Улмаар сүүлийн секундэд өрсөлдөгчийнхөө хийсэн дутуу мэхний эсрэг маш сайн ажиллаж дээр нь үлдэн 5:2 болгосон ч шүүгчдийн шийдвэр Хажи Алиевийн талд гарлаа.