Монголын хүүхдийн спортын VII наадмын хөгжлийн бэрхшээлтэй хүүхдүүдийн спортын тэмцээний нээлтийн ажиллагаа спортын төв ордонд боллоо. Тэртээ 2008 оны зуны паралимпын наадмаас Монгол Улсын хөдөлмөрийн баатар, гавьяат тамирчин Д.Баатаржав Монгол Улсын спортын түүхэнд анхны паралимпын аваргын алтан медалийг эх орондоо авчирсан түүхтэй.

       Тэр цагаас хойш жил бүрийн есдүгээр сарын 14-ний өдрийг Монголын паралимпын тамирчдын өдөр болгож ирсэн. Хөгжлийн бэрхшээлтэй хүүхдийн спортын олон төрөлт тэмцээнд хөдөө орон нутгийн болон нийслэлийн есөн дүүргийн ерөнхий боловсролын сургуулийн тамирчин сурагчид оролцож байна.

        Тэмцээнд оролцож байгаа тамирчид паралимпын жүдо бөх, хөнгөн атлетик, хонхтой бөмбөг, бочи дифлимпын волейбол, ширээний теннис, тусгай олимпын волейбол, бочи гэсэн найман төрлөөр өрсөлдөж аваргуудаа тодруулна. Монголын хүүхдийн спортын VII наадмын хөгжлийн бэрхшээлтэй хүүхдийн спортын тэмцээн таван өдөр үргэлжилж энэ сарын сарын 20-ны өдөр хаалтаа хийнэ.