Хятад Улс удахгүй болох гэж буй Ханжоугийн Азийн наадамд 1329 хүний бүрэлдэхүүнтэй баг, түүний дотор 886 тамирчныг оролцуулна гэдгээ мэдэгдлээ. XIX Азийн наадам Хятадын зүүн нутгийн Жэжян мужийн Ханжоу хотноо есдүгээр сарын 23-наас аравдугаар сарын 8-ны өдрүүдэд болно. Энэхүү наадамд Хятадын 449 эрэгтэй, 437 эмэгтэй тамирчин спортын 38 төрлийн 407 тэмцээн уралдаанд хурд хүчээ сорих ажээ. Хятадын тамирчдын дундаж нас 25 бөгөөд тэдний дунд 36 олимпын аварга байна.

         Токиогийн олимпын наадмын алтан медальт Бао Шаньжугийн хувьд, “Манай баг Азийн наадамд оролцох бэлтгэлээ базааж, олон улсын олон тэмцээнд оролцсон. Бид бэлтгэл сургуулилалтаа шаргуу хийсэн бөгөөд Ханжоуд амжилт гаргана гэдэгтээ итгэлтэй байна” хэмээн хэлжээ. Туялзуур сэлмийн дасгалжуулагчийн хувиар Азийн наадамд оролцох гэж буй олимпын аварга асан Лэй Шэн Азийн наадамд Хятадын 630 тамирчин гараагаа эхлүүлж байгааг онцлоод, залуу тамирчдад зоригтой байхыг зөвлөсөн байна. “Зөвхөн үр дүнд нь бус, тэмцээний явцад анхаарлаа хандуулах хэрэгтэй” хэмээн тэрбээр хэллээ.

      Хятадын Спортын ерөнхий газрын дарга Гао Жидань мягмар гарагт төлөөлөгчдөд үг хэлж, Ханжоугийн Азийн наадам, 2024 оны Парисын олимпын наадамд шинэ амжилт гаргахыг тамирчдадаа уриалжээ. "Хятадын спортын хүч чадлыг харуулахын тулд баг бүрэлдэхүүн бүгд хамтдаа хүчин чармайлт гаргах ёстой. Ханжоугийн Азийн наадам нь Азийн улс орнууд болон бүс нутгийн хамтын ирээдүйн төлөөх соёлын солилцооны агуу талбар юм” гэж тэрбээр онцлон тэмдэглэжээ.