Киргизстан Улсын Бишкек хотод сонсголын бэрхшээлтэй иргэдийн чөлөөт бөхийн ДАШТ дөрвөн өдрийн турш болж өндөрлөлөө. Тэмцээний сүүлийн өдөр 79 кг-ын жинд Монгол Улсын тамирчин Ш.Батбаатар барилдаж хүрэл медаль хүртэв. Тэрбээр эхний тойрогт Украины тамирчин Юкша Дмитрийг 10:0-ээр оноогоор ялсан.

       Улмаар Туркийн шигшээ багийн тамирчин Дондер Огузад 10:0-ээр ялагдаж, хүрэл медалийн төлөө АНУ-ын бөх Жонсон Эштен Генийг даралтаар цэвэр ялснаар дэлхийн аваргын гурав дахь медалиа хүртжээ. Ш.Батбаатар олон жил тив, дэлхий, олимпын наадамд жигд амжилттай барилдаж байгаа. Дифлимпын хошой хүрэл, ДАШТ-ий гурван хүрэл, АТАШТ-ий хошой хүрэл медаль хүртсэн амжилттай тамирчин юм.