“Монголын жүдо академи”-ийн залуу тамирчид Япон Улсад дасгалжуулагчийн хамт зочилж хамтарсан бэлтгэл хийгээд иржээ. Тэд наймдугаар сарын 22-оос есдүгээр сарын 5-ны өдрүүдэд хоёр долоо хоног үргэлжилсэн бэлтгэлийг Канагава мужид байрлах “Токай” их сургууль болон “Токай Сагами” ахлах сургуульд хийсэн байна.

          Жүдо бөхийн олон шилдэг сайн тамирчдыг төрүүлэн гаргасан тус сургуулийн удирдлага, дасгалжуулагч, тамирчид “Монголын жүдо академи”-ийн багийг элэгсэг дотноор хүлээн авч, мэдлэг чадвараасаа харамгүй хуваалцаж хамтран ажилласан юм.

         Шизүока мужийн Нүмазү хотын ахлах сургуульд одоо суралцаж байгаа Монголын “Жүдо академи”-ийн тамирчин Н.Жангарай, А.Галбадрах нар хүрэлцэн ирж энэхүү хамтарсан бэлтгэлд мөн оролцжээ. Жүдо бөхийн өлгий нутагт зочилсон Г.Хангарьд, А.Баттулга, М.Алтан-Од, Н.Тэмүүжин нар энэ удаагийн аяллаасаа их зүйлийг сурч мэдэж, ухамсарлаж, туршлагажиж, урам зориг авч ганзага дүүрэн ирсэн байна.