Монгол Улсдаа анхдагч болсон баруун бүсийн хязгаар хилийн Булган суманд “Шатрын ордон” баригдаж ашиглалтад орж, үйл ажиллагаагаа албан ёсоор эхлүүллээ.Энэхүү ордны нээлтийн ажиллагаанд ордныг санаачлагч Монгол Улсын Онц бөгөөд бүрэн эрхт элчин сайд Д.Ганхуяг, УИХ-ын гишүүн Б.Пүрэвдорж, Булган сумын засаг дарга Ж.Дамдинбазар, Булган сумын ИТХ-ын дарга Ж.Цогоо, Минжит Булган сумын Нутгийн зөвлөлийн дарга О.Батнасан, Монголын шатрын холбооны тэргүүн дэд ерөнхийлөгч Б.Наранбаатар, Ховд аймгийн Шатрын холбооны тэргүүн Б.Балдорж, МУГТ “Алдар” спорт хороо, ҮШБ-ын тамирчин Их мастер Б.Мөнгөнтуул, Ховд аймгийн Зэрэг сумын уугуул “Алдар” спорт хорооны тамирчин Их мастер С.Билгүүн, Ховд аймгийн Булган сумын харьяат Монгол Улсын шинэхэн харцага Г.Ганхуяг тэргүүтэй хүндэт зочид оролцлоо.

           Ордны үйл ажиллагааг нээж Онц бөгөөд бүрэн эрхт элчин Сайд Д.Ганхуяг,УИХ-ын гишүүн Б.Пүрэвдорж зэрэг олон хүндтэй зочид үг хэлсний дараа Монголын шатрын холбооны тэргүүн дэд ерөнхийлөгч Б.Наранбаатар үг хэлж шатрын ордны үйл ажиллагаанд амжилт хүсээд цаашдаа олон сум аймаг энэ жишгээр шатрын ордонтой болохыг уриалж,энэхүү сайхан шатрын ордныг санаачилж байгуулсан Д.Ганхуяг элчин сайдад Монголын шатрын холбооны хүндэт өргөмжлөл, дурсгалын цомыг гардууллаа.

          Мөн энэ үеэр Ховд аймгаас төрөн гарсан алдарт Их Мастерууд Б.Мөнгөнтуул С.Билгүүн нар Монгол Улсын Ерөнхийлөгч У.Хүрэлсүхийн бэлэглэсэн Их Эзэн Чингис хааны хөргийг хүндэтгэлтэйгээр Шатрын ордны хойморт заллаа.

          Шатрын ордны хичээлийн шинэ жилийг нээж хоёр Их Мастерийн зэрэг тоглолт, багш дасгалжуулагчийн сургалт зэрэг үйл ажиллагаагаар үргэлжлэн явагдах болно. Энэ дашрамд нутаг орондоо шатрын ордон байгуулж шатрын спортыг хөгжүүлж буй Ховд аймгийн Булган сумын удирдлагууд, Элчин сайд Д.Ганхуяг болон ордны бүтээн байгуулалтад оролцож дэмжлэг үзүүлсэн бүх байгууллага хувь хүмүүст Монголын Шатрын Холбооны удирдлага, мянга мянган гишүүд, шатарчид, өсвөрийн шатарчдын өмнөөс халуун талархал илэрхийлье.