Катар Улсад 2024 онд зохион байгуулагдах Азийн хөл бөмбөгийн холбооны 23 хүртэлх насны Азийн цомын тэмцээний урьдчилсан шатны тэмцээн болж байна. Тэмцээний “J” хэсэгт манай улсын баг Саудын Араб, Камбож, Ливан улсуудтай нэг хэсэгт орсон билээ. Хэсгийн тоглолтууд энэ сарын 6-12-ны өдрүүдэд Саудын Араб Улсын Абха хотод зохион байгуулагдаж эхэлсэн.

          Үүнээс өмнө нь 2001 оны хоёрдугаар сард 2002 оны ДАШТ-ий урьдчилсан шатны хэсгийн тоглолтоо Саудын Араб, Вьетнам, Бангладеш Улсуудтай тоглож ДАШТ-ий урьдчилсан шатнаас анхны оноогоо Бангладеш Улстай 2:2-ын харьцаатай тэнцэн авч байсан түүхтэй. Тэгвэл одоо Япон мэргэжилтэн Ичиро Оцука дасгалжуулагчаар удирдуулсан 23 хүртэлх насны шигшээ баг Цомоо хамгаалагчид болох Саудын Араб Улсын шигшээ багтай тоглолоо.

           Саудын Арабын шигшээ баг 2022 онд явагдсан АХБХ-ны 23 хүртэлх насны Азийн Цомын аваргууд бөгөөд энэ удаад аваргаа хамгаалж талбайдаа хэсгийн шатнаас төвөггүйгээр гарахыг хичээж байгаа.