Монгол Улсад анх удаа “Улаанбаатар-2023” Зүүн Азийн залуучуудын наадам зохион байгуулагдсан билээ. Тус их наадмын боксын  эмэгтэйчүүдийн 50 кг-ын жинд тулалдан мөнгөн медаль хүртсэн “Ихэр бээлий” клубийн тамирчин Батсайханы Саруултай ярилцлаа.

-Миний дүү өөрийгөө танилцуулахгүй юу. Хэдэн настай, аль сургуулийн сурагч вэ?

-Сайн байна уу. Намайг Саруул гэдэг. Би одоо 18 настай. Ерөнхий боловсролын Монгол 3-р сургуулийг энэ хавар төгссөн.

–Боксын спортоор хичээллээд удаж байгаа юу.  Хэд дэх жилдээ хичээллэж байгаа вэ?

-Боксын спортоор дөрөв дэх жилдээ хичээллэж байгаа.

 –Зүүн Азийн залуучуудын аварга шалгаруулах тэмцээнд амжилттай оролцож,  мөнгөн медаль хүртсэнд баяр хүргэе. Наадмын 50 кг-ын жинд хэдэн тулаан хийж мөнгөн медаль хүртэв?

-Баярлалаа. Зүүн Азийн залуучуудын наадамд  хоёр тулаан хийж мөнгөн медалийн болзол хангасан.

–Хятадын боксчинтой алтан медалийн төлөөх тулааныг хийлээ. Ямар тактикаар тулалдав. Түүнийг аргалчих боломж гарсангүй юу?

-Өрсөлдөгч тамирчин маань урагшаагаа нилээн дайрч тоглодог хэв маягтай боксчин байсан. Тэгээд өөдөөс нь зодолдоод урагшаагаа дайрах биш, хараад урд гараа ажиллуулж байгаад дайрангуут нь хоёр талд нь гараад эсвэл оновчтой цохиод гарах байсан юм. Гэтэл Хятадын тамирчин огтоосоо дайраагүй оноо авч тулалдсан. Тийм болохоор би бас өөрөө жаахан зайгаа мэдрэхгүй хүлээж тулалдсан нь буруудсан.

 –Хамгийн хүнд ширүүн өрсөлдөөнийг хятадын тамирчнаас гадна өөр аль улсын боксчинтой хийв?

-Тайландын тамирчинтай тулалдахад их амар, хялбар байсан юм шиг санагдсан. Тийм учраас сайн мэдэрч харж, урагшаагаа явж дайчин тулалдаж чадсан. Хамгийн ширүүн тулаан нь мэдээж Финалын тулаан л байлаа.

-Үзэгчийн нүдээр харахад хятадын боксчноос  дутаад байх зүйлгүй тэнцүүхэн тулаан хийх шиг болсон. Алтан медалийн төлөө тулалдахад сэтгэл  зүй хэр өндөртэй байсан бэ?

-Финалын тулааны өмнө миний сэтгэл зүй харьцангүй их тайван гоё байсан. Ямар ч сандралгүй толгойгоо олон зүйлд ч гашилгаагүй.  Уг нь ялах эрмэлзлэл, сэтгэл зүй өндөр байсан л даа. Харин тулаан санаснаар болоогүй.

-Өөрийн чинь тулааны онцлог гэвэл. Голчлон ямар тактикаар, гарын ямар цохилтуудыг хийж тулалддаг вэ?

-Миний өөрийн онцлог бол намхан болохоор өөрөө түрүүлж дайрч, довтолж өрсөлдөгчдөд ойртон, ойрын зайнаас ажиллах байгаа юм. Ойрын зайнаас оновчтой олон цохилтыг хийх, олон ажиллагаагаар өрсөлдөгчөө ядрааж, хялаалгаж өөрийн тулаанаа гаргах тактикыг хэрэглэдэг.

–Зүүн Азийн залуучуудын наадмаас өмнө өсвөр үе, залуучуудын олон улсын тэмцээн, Ази тивийн аварга, ДАШТ-д тулалдаж байсан уу?

- 2020 онд өсвөр үеийн Азийн аваргад оролцож байсан. Казахстан Улсад болсон залуучуудын олон улсын тэмцээнд мөн оролцож байв. Харин 2022 онд залуучуудын дэлхийн аварга шалгаруулах тэмцээнд оролцож байлаа.

-Боксоор өөрийнхөө гаргасан томоохон амжилтуудыг сонирхуулахгүй юу?

-Монгол Улсын залуучуудын улсын аварга. Насанд хүрэгчдийн “Шилдэг найман тамирчин”-ий тэмцээнээс хүрэл медальтай. Насанд хүрэгчдийн улсын аварга шалгаруулах тэмцээнээс мөн хүрэл медаль хүртэж байв. Казахстан Улсад болсон залуучуудын олон улсын тэмцээний мөнгөн медальтай. Олон хотуудын тэмцээний аварга болж байсан.

–Боксын тулааны эрдмийг хэн багшаар анх заалгав. Одоо хэн багшийн шавь бэ?

-Анх 2019 онд Түндэвийн Ганзориг багш дээрээ боксын спортыг сонирхон орсон. Одоо хүртэл тууштай Т.Ганзориг багш дээрээ хичээллээд алдаануудаа засах гээд хамтдаа хичээгээд явж байна. Эргэлт.мн танай сайтад баярлалаа. Танай хамт олонд гурван жилийн ойн баярын мэнд хүргэе. Ажлын өндөр амжилт хүсье.