Сагсан бөмбөгийн дэлхийн аварга шалгаруулах тэмцээний дөрөв дэх өдрийн тэмцээн өчигдөр явагдаж өндөрлөв.

ШИНЭ ЗЕЛАНД 95:87 ИОРДАН

        Хоёр багийн тоглолт ярих зүйл багатай өрнөсөн билээ. Эхнээсээ Шинэ Зеландын багийн давамгайлал дор явсаар өндөрлөсөн. Шинэ Зеландын шигшээ багийн бүрэлдэхүүний цөмөөрөө дотоодын лигийн тоглогчдоосоо бүрдсэн юм.

       Энэ удаагийн дэлхийн аварга шалгаруулах тэмцээний онцлох тоглогчдын нэг бол яалт ч үгүй Иорданы шигшээ багийн тоглогч Ронда Холлис Жефферсон. Тэрбээр өнөөдөр 39 оноо, есөн самбар, дөрвөн оновчтой дамжуулалт өгч, дэлхий нийтэд өөрийгөө харуулаад байгаа. Олон нийт түүнийг "Солгой Мамба" гэж хоч өгөөд байгаа юм. Түүний тоглолтын хэв маяг домогт Коби Брайнтыг санагдуулам. Ронда Холлис Жефферсон өмнө нь NBA-д таван улирал тоглож байсан удаатай.

ӨМНӨД СУДАН 89:69 ХЯТАД

      Өмнөд Суданы шигшээ баг Крис Андерсонаар удирдуулсан Азийн төлөөлөл Хятадын шигшээ багийг 30 онооны зөрүүтэй хожлоо. Тоглолтын турш Өмнөд Суданы шигшээ баг онооны илүү явсаар 89:69-ийн харьцаатай өндөрлөсөн юм. Өмнөд Суданы шигшээ баг тэмцээний эхний тоглолтдоо Пуэрто Рико Улсын багийн эсрэг ширүүн өрсөлдөөн үзүүлж, 101:95-ын харьцаатай хожигдоод байсан. Хятадын шигшээ баг тэмцээний эхний хоёр тоглолтод ялагдал хүлээснээр, дараагийн шатанд шалгарах магадлал бага боллоо. Тоглолтын онцлох статистик: Өмнөд Суданы шигшээ багийн эсрэг багаараа 15 холын зайн шидэлт амжилттай гүйцэтгэжээ.

КОТ Д'ИВОРЕ 71:69 ИРАН

       Өчигдрийн хамгийн өрсөлдөөнтэй тоглолтуудын нэг Кот Д'Иворе болон Ираны шигшээ багуудын хооронд өрнөлөө. Хожил авсан Кот Д'Иворе Улсын шигшээ багаас өчигдөр Францын лигт тоглодог Нисре Зоузоуа гэж залуу тун онцгой тоглолт үзүүлж 17 оноо авч багаа хожилд хөтөлжээ. Хоёр багийн тоглолт өгөө аваатай болж, эцсийн мөчид Соло Диабате гэж тоглогчийн хожлын хоёр чөлөөт шидэлтээр Кот Д'Иворе Улсын шигшээ баг хожсон юм.

СЛОВЕНИ 88:67 ГҮРЖ

          NBA-ийн супер од Лука Дончичоор удирдуулсан Словенийн шигшээ баг Гүрж Улсын шигшээ багийг төвөггүйхэн хожиж, хасагдах дараагийн шатанд шалгарах эрхээ баталгаажууллаа. Лука Дончич олон улсын тавцанд өөрийгөө харуулж, ДАШТ-ий эхний хоёр тоглолтдоо тус бүр 30 оноо аваад байна. Одоогоор нийт авсан оноогоороо бүх тоглогчдыг тэргүүлж байгаа аж. Словенийн шигшээ баг "F" хэсгийг одоогоор нэг ч хожигдоогүй амжилттай тэргүүлж буюу хэсгийн сүүлийн тоглолтоо Африкийн Кабо Верде Улсын шигшээ багийн эсрэг хийнэ.