Тулааны дэвжээн дээр гараад түүний нүд зөвхөн өрсөлдөгчөө л харна. Түүнийг буулгаж авах гэсэн өрсөлдөгчийнхөө гараас тэр хурдан шаламгай бултаж хариу цохилтыг нүд ирмэхийн зуурт л өгнө. Ихэнх ялалтыг шууд л хүнд цохилтоор авдаг. Тэр бол холимог тулааны тамирчин М.Нандин-Эрдэнэ. БНСУ-д ажиллаж, амьдардаг тэрбээр 2015 оноос эхлэн мэргэжлийн дэвжээнд хүчээ сорьж байгаа нэгэн. Харь улсад ажиллаж, амьдардаг ч бэлтгэлээ таслалдуулаагүйгээр хийж эх орныхоо нэрийн өмнөөс олон тулаанд оролцож амжилт гаргасаар байна.

МОНГОЛ ТУЛААНЧ, ИНЭЭДЭГ ЖААЛ УКА

                М.Нандин-Эрдэнэ холимог тулаанаар хичээллэж эхэлсэн үеийнхээ талаар “Кикбоксоор улсын аварга болж, таеквондогоор хичээллэж байсан болохоор тулааны спортод ороход хэцүү байгаагүй. Дэлхий нийтээр шуугьж байгаа спортоор хичээллэж үзье гэж бодсон. Солонгост гэр лүү харих замд холимог тулааны нэг клуб байдаг байсан юм. Тэгээд нэг удаа ороод бүртгүүлэх гэж үзсэн. Гэтэл намайг нэг л үл тоосон, доош  хийсэн “Чи чадах уу” гэсэн харцаар хараад байсан юм л даа. Маргааш нь дахин очоод багшийг нь зодчихсон. Надад зодуулсан багш нь “Энэ сайн тамирчин байна” гэж үнэлээд бүртгэж байлаа. Түүнээс хойш хоёр, гурван сар бэлтгэл хийж анхны тэмцээндээ орсон. Анхны тэмцээнээр өрсөлдөгчөө хүнд цохилтоор ялж байлаа” хэмээж байжээ. Солонгост хүмүүс түүнийг М.Нандин-Эрдэнэ бус Smile killer, тулаанч Ука гэдгээр нь таньж, дэмжинэ. Олимп, ДАШТ-ий мөнгөн медальт Н.Төгсцогт, Армийн дэлхийн аварга Б.Чинзориг тэргүүтэй шилдэг боксчдын анхны багш, Гавьяат дасгалжуулагч А.Гантулгын шавь М.Нандин-Эрдэнэ. Түүнийг тулааны урлагтай холбогдоход гэр бүл нь нягт холбоотой. Аав, эгч, дүү нар нь тулааны урлагаар хичээллэж байсан түүхтэй.

“ROAD FC” ХОЛБООНД ТУЛАЛДСАН МОНГОЛЫН АНХНЫ ТУЛААНЧ

                Тэр тулалдах гэж л төрсөн мэт тулаанч. Холимог тулааны спортод хүч сорихоосоо өмнө боксоор Азийн аваргаас мөнгөн медаль хүртэж, шигшээ багт хүртэл багтаж, жиншисэн каратэгээр Азийн аварга болж байв. Кикбоксоор улсад дөрөв түрүүлж, олон улсын таеквондогоор ч мөн адил улсдаа дөрөв түрүүлсэн байна. Монгол зо зулааны улсын аварга, гардан тулааны тэмцээний аварга болжээ. УАШТ-ий өсвөр үеийнхэд дөрөв, залуучуудынхад гурван жил тасралтгүй түрүүлсэн, насанд хүрэгчдийнхээс хоёр алтан медальтай тэрбээр Азийн дэд аварга. Үүгээр зогсохгүй тэр “Road FC” холбоонд тоглосон Монголын анхны тулаанч. “Road FC” холбооноос гадна Солонгос дахь анхны Монгол тулаанч билээ.

                Харь улсад ажиллаж, амьдарч байгаа түүний бэлтгэл ажил тарсны дараа эхэлдэг. Солонгос Улсад ажиллаж амьдарч байгаа бусад хүмүүстэй л адил олдсон ажлыг гололгүй хийж өдийг хүрчээ. Ажил нь тогтмол цагт тардаггүй учир тарсан цагт нь 2-3 цаг бэлтгэл хийнэ. Тэрбээр энэ талаараа “Би чөлөөт цагаараа л зодолддог. Өглөө ажилдаа гарч, орой тараад бэлтгэлээ хийдэг. Солонгост Монголчууд хүнд, хэцүү ажил хийдгийг хүн бүр мэднэ. Ядарсан үедээ бэлтгэлээ таслаад унтчихсан байдаг юм.  Ийм л энгийн амьдардаг. Тамирчид өдөрт гурван удаа бэлтгэл хийх ёстой. Бүр ядаж хоёр удаа. Надад харин бэлтгэл хийх цаг зав хомс гардаг. Долоо хоногт гуравхан удаа хийх тохиолдол ч бий. Ажил хийж, суралцаж, гэр бүлдээ цаг зав гаргахын хажуугаар бараг чөлөөт цагаараа бэлтгэл хийгээд байгаа юм” хэмээжээ.

                 2018 онд нэг сая ам.долларын төлөө 32 тамирчинтай өрсөлдөхдөө шилдэг наймд шалгарсан М.Нандин-Эрдэнэ 2017 онд “Road FC”-ийн хүнд цохилтын эзэн шагнал хүртсэн. 2019 онд “Korean all boxing counsulin” (KABC) холбооны БНСУ-ын аварга, өнгөрсөн жил WAKO холбооны Солонгосын аварга болсон юм. Одоо түүнд Road To UFC  холбооны нэг сая ам.долларын эзэн болоход ганцхан ялалт хэрэгтэй.