ОХУ-ын Екатеринбург хотын “ЭКСПО” төвд энэ сарын 20-ны өдөр оюутны фестивалийн нээлтийн ёслол амжилттай боллоо. Ёслолд ОХУ-ын Засгийн газрын шадар сайд  Дмитрий Чернышенко, ОХУ-ын Ерөнхийлөгчийн туслах Игорь Левитин, ОХУ-ын Спортын сайд Олег Матыцин, Свердловск мужийн захирагч Евгений Куйвашев нарын зэрэг олон арван албаны хүмүүс оролцлоо.

             Игорь Левитин нь ёслол дээр ОХУ-ын Ерөнхийлөгч Владимир Путины наадамд оролцогч нарт хандсан илгээлтийг уншиж сонордуулав. Наадмын нээлтэд оролцогч 35 орны 280 их, дээд сургуулийн туг, нэрийг дуудах ёслол боллоо. Мөн тамирчин, шүүгчийн тангарагийг өргөв. Нээлтийн үед үзэгч нар “Урал Опера Балет” театрын тоглолт, эстрадын бусад хамтлаг, алдартай дуучид тоглолтоо сонирхуулан үзүүлэв.

            Спортын сайд О. Матыцин, мужийн захирагч Е. Куйвашев нар баяр хүргэн үг хэлсэн бол Шадар сайд Дмитрий Чернышенко фестивалийг нээж үг хэллээ. Ийнхүү Нээлтийн ёслол амжилттай болсон ба арга хэмжээ, урлагийн тоглолтыг алдарт уран гулгагч Илья Авербух найруулан тавьжээ. Дашрамд дурьдахад Фестиваль нь Екатеринбург хотноо 2023 оны наймдугаар сарын 19 -31 –ний хооронд 14 спортын төрлөөр 197 зай, жин, төрөлд явагдаж байна.