• Өнөөдөр 2025-02-25

Сагсан бөмбөгийн 5x5, таэквондогийн тэмцээн өнөөдөр эхэлнэ

2023-08-19,   381

 

       Зүүн Азийн залуучуудын наадмын дөрөв дэх өдөр найман спортын тэмцээн явагдана. Өчигдөр 3х3 сагсан бөмбөг, жүдогийн тэмцээн өндөрлөсөн бол өнөөдөр үндсэн 5х5 сагсан бөмбөг, таэквондогийн тэмцээнүүд эхэлж байна.

БОКС:

Наадмын боксын тэмцээнд Монголын 10 тамирчин өрсөлдсөнөөс тав нь финалд шалгарч, өнөөдөр алтан медалийн төлөө тулалдах гэж байна. Эмэгтэйчүүдийн 50 кг-д Б.Саруул БНХАУ-ын Лю Чиан Фантай, 60 кг-д Д.Гэрэлсайхан мөн БНХАУ-ын Ли Чиан Вэнтэй нударга зөрүүлнэ. Түүнчлэн эрэгтэйчүүдийн 51 кг-д Х.Дөлгөөнсайхан БНХАУ-ын Жан Хан Руитай, 54 кг-д О.Энхсайхан БНХАУ-ын Хуан Жиа Хаотай, 63.5 кг-д Ү.Баасандаш мөн БНХАУ-ын Хан Жиа Чаотай тулалдахаар болоод байна. Тоглолтууд 15:00 цагаас эхлэн явагдах бөгөөд МҮОНТ шууд дамжуулан үзүүлнэ.

САГСАН БӨМБӨГ:

Сагсан бөмбөгийн 5х5-ын  тэмцээн өнөөдөр 15:00 цагаас Монгол-Тайванийн эрэгтэй багуудын тоглолтоор эхлэх болно. Залгуулаад 17:00 цагаас Монголын эмэгтэй шигшээ Хонконгийн багтай тоглох юм. Сагсан бөмбөгийн тоглолтууд “UG Arena”-д болох бөгөөд “Premier Sports Network” телевиз шууд дамжуулан үзүүлнэ.

БАДМИНТОН:

Өнөөдөр 12:00 цагаас эхлэн эрэгтэй, эмэгтэй ганцаарчилсан төрлийн 1/4 шигшээ болон эрэгтэй, эмэгтэй хосын хагас шигшээ тоглолтууд Футзалын ордонд явагдана.Төгсгөлд нь холимог хосын аваргын төлөө тоглолт болох юм. Бадминтоны тэмцээнийг “Live TV” шууд дамжуулан үзүүлж байна.

И-СПОРТ:

Виртуал теннисний шийдвэрлэх тоглолтууд Соёлын төв өргөөнд 10:00 цагаас эхлэн явагдана. Харин 14:00 цагаас King of Fighters төрлийн тэмцээн эхэлж, 20:00 цаг хүртэл үргэлжлэх юм.Тус төрөлд Б.Мандахнаран, Ж.Батсаруул нар эх орноо төлөөлөн оролцох гэж байна.

ШИРЭЭНИЙ ТЕННИС:

Эрэгтэй, эмэгтэй ганцаарчилсан төрлийн тэмцээнүүд өнөөдрөөс эхэлж байна. Манай улсаас эрэгтэй, эмэгтэй тус бүр таван тамирчин өрсөлдөх юм. “Ган спорт төв”-д болж буй ширээний теннисний тоглолтуудыг МҮОНТ шууд дамжуулан үзүүлнэ.

ВОЛЕЙБОЛ:

Волейболын тэмцээн өчигдөр эхэлсэн ч манай шигшээ тоглолгүй өнжсөн. Харин өнөөдөр эмэгтэйчүүд 15:00 цагаас Хонконгтой, эрэгтэйчүүд 20:00 цагаас мөн Хонконгийн багтай тоглох сугалаа татжээ.“Буянт-Ухаа” спортын ордонд үргэлжилж буй волейболын тэмцээний бүх тоглолтыг МҮОНТ шууд дамжуулан үзүүлнэ.

ХӨЛ БӨМБӨГ:

Эхний тоглолтдоо БНХАУ-ын багт хожигдсон манай эмэгтэйчүүдийн шигшээ өнөөдөр 17:00 цагаас Хонконгийн эсрэг тоглох болно. Монголын хөл бөмбөгийн холбооны ногоон талбайд болох тоглолтуудыг МҮОНТ шууд дамжуулан үзүүлнэ.


 

 


Сагсан бөмбөгийн 5x5, таэквондогийн тэмцээн өнөөдөр эхэлнэ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188