Монгол Улсад анх удаа зохион байгуулаглаж буй “East Asian Youth Games-2023” буюу “Улаанбаатар 2023” Зүүн Азийн залуучуудын наадмын 3х3 сагсан бөмбөгийн төрөлд Монголын эрэгтэй шигшээ баг өчигдөр “А” хэсгийн хоёр тоглолтыг хийсэн билээ. Хэсгийн эхний тоглолтод Хонконгын шигшээ багийг 21:9 харьцаатайгаар буулган авч хэсгийн эхний хожлоо авсан. Хэсгийн хоёр дахь тоглолтоо хятадын шигшээ багийн эсрэг хийлээ. Хүндхэн тоглолтын төгсгөлийг маш сайн тавьж эцсийн мөчид 21:17 гэсэн харьцаатайгаар ялалт байгуулан нэг ч хожигдолгүйгээр өнөөдөр аваргын төлөө тоглохоор боллоо.

           Тоглолтын хувьд тамирчидын бэлтгэл тун сайн хангагдсаныг хоорондын ойлголцол, тоглолтын гүйцэтгэлээс шууд харж болохоор байлаа. Тэмүүлэн бол яалт ч үгүй ур чадвар өндөр, монголын өсвөрийн хамгийн шилдэг тоглогчдын нэг гэдгээ дахин батлан харуулах шиг боллоо. Оргилын хувьд өөлөх зүйлгүй сайхан тоглолоо. Өндөр нуруутай, шидэлттэйгээс гадна хурдан хэмнэлтэй, тун чиг жигд сайхан тоглогч байна.

          Мөн манайхны нурууны өндөр дутуу гэсэн ойлголт ард хоцорсон гэдгийг Э.Ирмүүн, А.Азбаяр нарын самбарын маш сайн тоглолтоос харж болохоор байна. Энэ хөвгүүд, энэ бүрэлдэхүүнээрээ өнгөрсөн жилийн Азийн аваргаас хүрэл медалийг хүртсэн баг юм. Залуус ирээдүйн монголын шигшээд багтан, гялалзаж явах нь цаг хугацааны асуудал биз ээ.

Монгол Улсын багийн гишүүд:

Э.Ирмүүн-17 настай.  200 cm өндөртэй. 85 kg жинтэй. хувийн дугаар “6”.

Т.Тэмүүлэн-18 настай.  180 cm өндөртэй.  68 kg жинтэй. Хувийн дугаар “11”.

Х.Оргил-18 настай. 188 cm өндөртэй.  73 kg жинтэй. Хувийн дугаар “2”.

А.Азбаяр-18 настай. 205 cm өндөртэй. 85 kg жинтэй. Хувийн дугаар “7”.