Япон Улсын Шизүока мужийн Изүнокүни хот нь “Монголын жүдо академи” болон Монголын жүдо бөхийн холбоотой нягт хамтран ажиллаж, олон төсөл хөтөлбөрүүдийг хэрэгжүүлдэг билээ. “Жүдо академи”-ийн баг тамирчид жил бүр тус хотод зочилж хамтарсан бэлтгэл хийхээс гадна тэмцээн уралдаанд оролцдог уламжлалтай. Мөн Монголын үндэсний шигшээ багийн тамирчид Токио 2020 зуны Олимпын наадмын өмнөх бэлтгэл сургуулилалтаа тус хотод базааж байсан юм.

Тэгвэл Японы Изүнокүни хотын дарга ноён Ямашита Масаюүки болон бусад албаны хүмүүс “Монголын жүдо академи”-ийн бэлтгэл дээр зочилж танилцжээ. Монгол Улсын жүдо бөхийн хөгжлийг үргэлж дэмжиж ажилладаг байдаг ноён Ямашита энэ үеэрээ манай залуу тамирчдад амжилт ялалтыг хүсэж, өмнөө тавьсан зорилго, хүсэл мөрөөдөлдөө хүрэхийг захисан юм.

“Монголын жүдо академи” болон Япон Улсын Изүнокүни хот хоорондын хамтын ажиллагаа цаашдаа улам өргөжин тэлж, монголын жүдо бөхөөр суралцагчдад олон сайхан боломжийн үүд хаалга нээн өгч байна. Япончууд Монгол Улсын жүдо бөхийн ирээдүйн залуу халаа болсон өсвөрийн баг тамирчдыг дэмжин ажилласаар байгаа билээ.