Белград-2023 чөлөөт бөхийн дэлхийн аварга шалгаруулах тэмцээнд зодоглох монголын эмэгтэй баг тодорсон билээ. Харин 53 кг-ын жинд гавьяат тамирчин Б.Болортуяа, ОУХМ Г.Отгонжаргал нарын халз барилдаан дэлхийн аварга шалгаруулах тэмцээний цугларалт дээр өнөөдөр боллоо. Үдээс өмнө МУГТ Б.Болортуяа, ОУХМ Г.Отгонжаргал нарын сорил барилдаан эхэлж эхний ээлжийн барилдаанд 8:5-ын харьцаатай оноогоор Г.Отгонжаргал ялалт авсан.

Үдээс хойш хоёр дахь ээлжийн барилдаанд Б.Болортуяа гавьяат 3:1-ийн харьцаатай оноогоор ялж сорил барилдааны ялалтыг 1:1-ийн харьцаатай болгон тэнцүүлсэн. Гурав дахь үеийн шийдвэрлэх барилдааны эхний үед гавьяат Б.Болортуяа 3:0-ээр илүүрхэж явсан.  Гурав дахь барилдааны хоёрдугаар үеийн барилдааны 2:22 минутад Б.Болортуяа давхар хамах мэх хийхэд ОУХМ Ганбаатарын Отгонжаргал мордож дараад тооны харьцааг 4:3 болгон, улмаар цэвэр ялалт авав. Олимпын хүрэл медальт, гавьяат тамирчин Б.Болортуяа тактикийн маш том алдаа гарган ийнхүү ялагдал хүлээв. Оноогоо хамгаалах тактикаар барилдсан бол ялах байлаа. Сорил тэмцээн гавьяатын сэтгэл зүйд маш хүнд дарамт болсон нь энэхүү барилдаанаар илт харагдаж байв.

Эмэгтэйчүүд:

    50 кг-д: Долгоржавын Отгонжаргал - 3 дахь удаагаа

    53 кг-д Ганбаатарын Отгонжаргал 2 дахь удаагаа

    55 кг-д: Чинболдын Отгонтуяа - анх удаагаа

    57 кг-д: Бат-Эрдэнийн Эрдэнэсувд - 2 дахь удаагаа

    59 кг-д: Хүрэлхүүгийн Болортуяа - 3 дахь удаагаа

62 кг-д: Пүрэвдоржийн Орхон - 2 дахь удаагаа

65 кг-д: Түвшинжаргалын Энхжин - 2 дахь удаагаа

68 кг-д: Энхсайханы Дэлгэрмаа - 3 дахь удаагаа

72 кг-д: Энх-Амарын Даваанасан- 3 дахь удаагаа

76 кг-д: Найгалсүрэнгийн Загардулам - 2 дахь удаагаа ДАШТ-д оролцох гэж байна.