Энэ жилийн үндэсний их баяр наадмаар Архангай аймгийн Цэнхэр сумын харьяат “Алдар” спорт хороо, “Нутгийн буян” групп, “Бөх билэгт” дэвжээний бөх улсын гарди М.Бадарч ес даван түрүүлж, улсын арслан цол хүртсэн. Тэрбээр 1990 оны арванхоёрдугаар сарын 21-нд төрсөн бөгөөд аав нь Баянхонгор аймгийн Эрдэнэцогт сумын уугуул бөгөөд нэгдлийн мал маллан Архангай аймагт орж байжээ. Харин ээж нь Өвөрхангай аймгийн Бат-Өлзий сумын уугуул хүн байна. Ийн залгаа гурван аймгийн нэрээр хүчит бөхийн ногоон дэвжээнд хүч үзэн барилдаж байгаа билээ. Анх 2009 онд анх ээжийнхээ нутагт буюу Өвөрхангай аймгийн Бат-Өлзий суманд очиж барилдан сумын начин цол хүртсэн байна.

Улсын заан Д.Хишигдорж анх түүнд багшилснаар 2011 оноос бэлтгэл хийж, улсын заан З.Дүвчин багшийнхаа удирдлагад чөлөөт бөхөөр барилдаж эхэлжээ.

           Ингээд 2012 онд Архангай аймгийн баяр наадамд сумын заан Б.Мөнх-Эрдэнээр найм даван түрүүлж аймгийн арслан цол хүртсэн байна. 2016 онд бүх цэргийн баяр наадамд цэргийн начин Д.Цэрэнтогтоход өвдөг шороодон үзүүрлэж, “Бадрангуй чимэг” цол хүртжээ. Дараа жил нь 2017 онд бүх цэргийн баяр наадамд тав давж шөвгөрөн “нэмэх” чимэг хүртсэн байдаг. Харин тэр жилээ буюу Ардын хувьсгалын 96 жилийн ойн баяр наадамд улсын заан Б.Соронзонболдоор дөрөв, улсын гарди Ж.Бат-Эрдэнээр тав, улсын начин Б.Батчулуунаар зургаа даван шөвгөрч Монгол Улсын Арслан цол хүртсэн байдаг.

      Тэгээд 2020 онд Ардын хувьсгалын 99 жилийн ойн баяр наадамд аймгийн арслан Б.Мөнх-Эрдэнээр дөрөв, аймгийн арслан Н.Хүрэлсүхээр тав, аймгийн арслан Х.Цогтгэрлээр зургаа, улсын арслан Р.Пүрэвдагваар долоо давж Монгол Улсын заан цолыг хүртсэн. 2021-2020 даян аварга Н.Батсуурь сэргээш хэрэглэсэн байсан тул давааг нь нөхөн олгож, Монгол Улсын гарди цолыг хүртсэн байдаг. Харин өнөө жилийн баяр наадмаар ес даван түрүүлж, улсын арслан цол хүртсэн байдаг. Улсын арслан цол хүртээд “Архангай аймаг болон аав, ээж, гэр бүлийнхэн минь намайг түрүүлээсэй гэж их хүсэж байсан, тэднийхээ хүслийг биелүүлсэндээ баяртай байна. Зарим жил өөрийнхөө хариуцлагагүйгээс болж унаж, сэтгэлийг нь гонсойлгож байлаа. Энэ жил санаснаараа сайн барилдахыг хичээж, хоёр сайхан багшийнхаа үгэнд орж, дасгалжуулагчийнхаа үгнээс гараагүй байж сайхан амжилт үзүүллээ” хэмээн сэтгэгдлээ хуваалцсан.

Үндэсний их баяр наадмаас хойш тэрбээр Архангай аймгийн 100 жилийн баяр наадамд үзүүрлэсэн амжилттай байгаа билээ.

     М.Бадарч арслан бөхөөр барилдахаас гадна их сайхан дуулдаг бөгөөд “Чамайг тойрон эргэлдэнэ”, “Очно доо” зэрэг дууг найр, наадам, нэвтрүүлэгт дуулсан байдгийг нь үзэгчид андахгүй. Өнөөдөр харин арслан цолныхоо мялаалгын наадмыг хийж,  хурдан нас, дааганы уралдаан, хүчит бөхийн 128 бөхийн барилдаан, өсвөрийн 32 бөхийн барилдааныг явуулж байгаа аж.