Монгол Улсад түүхэндээ анх удаа ОУОХ, Азийн олимпын зөвлөл, Зүүн Азийн олимпын хорооны удирдлага дор 11 спортын 12 төрлөөр “Улаанбаатар 2023” Зүүн Азийн залуучуудын наадмыг энэ сарын 16-23-ны өдрүүдэд зохион байгуулна.

Нийслэл Улаанбаатар хотын 10 спорт байгууламжид явагдах тус наадмын тасалбарыг “Улаанбаатар 2023” Зүүн Азийн залуучуудын наадмыг зохион байгуулах хороо “Гэр Медиа” ХХК-тай хийсэн хамтран ажиллах гэрээний дагуу TICKET.MN худалдаалж эхэллээ.

Үзвэр үйлчилгээний тасалбар, суудал захиалгыг хүссэн цагтаа, хүссэн газраасаа захиалах, худалдан авах цахим үйлчилгээг нэвтрүүлэгч TICKET.MN-ээс спорт сонирхогчид наадмын нээлтийн үйл ажиллагаа, мөн тэмцээн уралдааны цахим болон биет тасалбарыг албан ёсны эрхтэйгээр худалдан авах боломжтой юм. “Улаанбаатар 2023” Зүүн Азийн залуучуудын наадмын тасалбарыг 10,000 төгрөг болон 5000 төгрөгийн үнийн сонголттойгоор худалдаанд гаргасан байна.