Уран барилдаан, үнэнхүү хүчийг үзүүлж, улсын цолтнуудыг  өвдөг шороодуулаад буй нэгэн бол аймгийн харцага, Алдарт спорт хорооны бөх Б.Өлзийсайхан. Тэрбээр Хантайшир уулын аймаг байгуулагдсаны 100, Говь-Алтай аймгийн баяр наадмын хүчит бөхийн барилдааны нэгийн даваанд аймгийн начин Б.Эрдэнэбаатар, хоёрын даваанд улсын начин Б.Ганхуяг, гурвын даваанд улсын начин О.Түмэн, дөрвийн даваанд даян аварга Н.Батсуурь, тавын даваанд улсын заан Н.Жаргалбаяраар давж шөвгийн наймд шалгарсан. Өвөрхангай аймгийн Зүүнбаян-Улаан сумын харьяат тэрбээр чөлөөт бөхийн олон улсын хэмжээний мастер цолтой. Б.Өлзийсайханы бага нас Зүүнбаян-Улаан сумын зүүн хоолой гэх газарт өнгөрч, эмээ нь түүнийг багад нь бөх болно гэж шинжиж байсан тухай ярьсан байдаг.

Аав нь залуудаа чөлөөтөөр барилддаг байсан, ах нь чөлөөт бөхийн олон улсын хэмжээний мастер байна. Харин тэрбээр чөлөөт бөхийн өсвөр залуучуудын улсын аварга, оюутны улсын гурван удаагийн аварга, насанд хүрэгчдийн улсын гурван мөнгө, дөрвөн хүрэл медальтай. Мөн олон улсын уралдаан тэмцээний амжилт ч дүүрэн байна.

-Үндэсний бөхөөр 2012 оноос барилдаж эхэлсэн-

               Тэрбээр үндэсний бөхөөр өсвөрийн барилдаанд хоёр түрүүлж, 2012 онд сумын начин болсноос хойш үндэсний бөхөөр тууштай барилдаж эхэлсэн байна. Ингэхдээ бөхийн өргөөнд зохион байгуулагдсан сумын цолтнуудын барилдаанд зургаан удаа үзүүрлэж, нэг удаа гуравт орсон амжилтыг үзүүлжээ. 2013 онд оюутны улсын аваргад оролцож, тухайн үед улсын харцага цол хүртээд байсан Э.Оюунболдыг давжээ. Харин 2017 онд зохиосон бүх аймгийн начин цолтой бөхчүүдийн барилдаанд сумын заан цолтой барилдаад түрүүлсэн байна. Дараа жил нь харин 2018 онд Налайхын наадамд барилдаад зургаа давж, аймгийн харцага цол хүртсэн.  Харцага цол хүртэхдээ тэрбээр тус наадмын хоёрын даваанд улсын харцага А.Бямбажав, гурвын даваанд улсын начин Ч.Баянмөнх, дөрвийн даваанд улсын заан Д.Баянмөнх, тавын даваанд улсын заан Т.Санчир, зургаагийн даваанд аймгийн начин Д.Дэмиддоржийг давжээ.

             2019 онд Б.Орхонбаяр арсланг начин байхад нь өвдөг шороодуулж,  2020 онд тусгаар тогтнолын барилдаанаар шинэхэн харцага цол хүртээд байсан О.Хангай аваргыг давж байжээ. Ийн хүчтэй залуу харцагын улсын цолтнуудыг унагаадаг амжилт нэгээр нэмэгдэж, Хантайшир уулын аймаг байгуулагдсаны 100 жилийн баяр наадамд даян аварга Н.Батсуурийг өвдөг шороодууллаа. Гэхдээ тус наадамд тэрбээр цолоо ахиулах, чимэг нэмэх зорилготой байсан ч барилдах явцад цол олгохгүй гэж зарласанд хариуцсан газар нь шийдэж өгөхийг хүсэж байгаа аж.