“Тураг эцэхээрээ уулаа, хүн ядрахаараа нутгаа” гэдэг дээ. Нэгэн цагт Төв аймгийнхныхаа гэлтгүй улсынхаа бахархал, шүтээн нь болж “асаж” явсан А.Сүхбат аварга УИХ-ын гишүүн болж, ЖДҮ-ийн хэрэгт холбогдсоноороо бусдад муу хэлэгдэж, ард түмэндээ ад үзэгдэж явсан. Гэхдээ хүнийг зовохын цагт, нас нэмэхийн цагт түшээд авах нутаг гэж сайхан байдаг юм байна. Төв нутгаас төрсөн олон аваргын дундаас тодрон гарч ирж байсан залуу үе шигээ А.Сүхбат аварга төрөлх нутгийнхаа наадамд дархан аварга цолтойгоо зодоглож, тав даван төрийн сүлдээ тойрч явахыг нь харах ямар сайхан байв аа. Монгол түмэндээ мартагдашгүй дархан аварга А.Сүхбат “Төв аймгийн энэ л дэвжээнээс төрсөн юм шүү” гэдгээ харуулан төрөлх нутгийнхаа наадмыг чимж чадлаа.

-НУТГИЙНХАН НЬ ХҮРТЭЛ НҮҮР БУРУУЛЖ БАЙСНЫГ МАРТАЖ, “НУТАГ МИНЬ ТҮШНЭ” ГЭЭД Л БАРИЛДЛАА ДАА, А.СҮХБАТ АВАРГА-

Аваргын жудаг хаа холдох билээ. Болох бүтэхгүй зүйлд нэр холбогдож түмэн олондоо муу хэлүүлж явсан ч түмний дунд мартагдаагүй хүч бяраа дахин харууллаа. Тэгэхдээ үнэхээр жудагтай, дархан аварга ёсоороо орж, нутгийнхаа дүүд тахимаа өглөө. Дархан аварга А.Сүхбат төрөлх нутгийнхаа түүхт ойгоор цааш нь илүү барилдаж, давахыг хүссэн л байх. Тэгж ч чадахыг бөхөд хайртай монгол түмэн мэднэ. Гэхдээ дархан аварга А.Сүхбат тэгсэнгүй. Төв нутгийнхаа 100 жилийн ойн баяр наадмын хүчит бөхийн барилдааны зургаагийн даваанд Алтанбулаг сумын харьяат аймгийн арслан П.Эрхэмжаргалыг амлаж аваад, тахимаа өгөх гэж тэгж их зовоож, удаасангүй. П.Эрхэмжаргал арслан ч зургаагийн даваанд хамгийн түрүүнд давж, дараагийн даваандаа хүчээ сэлбээд сууж байх. Тэр үүнийг л хүссэн. Төрөлх нутгийнхаа тэрхэн дэвжээн дээр дахин зодоглож, “Төв нутгаас төрөн гарсан хүчит аваргуудын нэг би юм шүү” гэдгээ аваргын зангараг, өөрийн бяраар харуулж, нутгийн зон олноо цэнгүүллээ.

                  Дархан аварга А.Сүхбатын нэр холбогдсон болох, бүтэхгүйг дурдвал өчнөөн бий. УИХ-ын гишүүн болж, ЖДҮХС-гаас мөнгө идсэн гээд муу хэлүүлж байхад нь “Увс аймгийнхантай нийлж, бөхийн холбоог самарсан” гээд нутгийнхан нь ч нүүр өгөөгүй. Нутаг, усаар нь түүнийг гоочилж, муу хэлж байхад “Төрөлх нутаг минь” гээд Төв нутгаа чимж байгаа нь юутай сайхан. Тэгэхдээ бүр сайн ч бөх сайхан ч хүн гэдгээ дахин харуулах шиг. Нутгийнхаа 100 жилийн баяр наадмаар А.Сүхбат аваргыг зодоглоно гэдгийг мэдсэн нэгэн 80 хүрч яваа буурай Улаанбаатар хотоос Төв аймгийн наадмыг зорьж очжээ. Залуугийн л бөх үзэж, сонирхдог буурай дархан аварга А.Сүхбатын маш том дэмжигч гэдгээ хэлж, хамт зураг даруулахыг хүсдэг юм байна. Тэгсэн А.Сүхбат аваргаа гэнэт телевизийн асар руу гүйгээд, гартаа сандал барьсаар гүйхээрээ ирээд буурайг суулгаж, нутгийн сониноос эхэлж сонсоод хамт дурсгалын зураг татуулж байх. Үнэнхүү жудагтай бөх, хүндлэлтэй хүн гээчийг А.Сүхбат аваргаас харж болно.

Төв нутгийнхаа тэр л дэнж дээрээс үеийнхээ хүүхдүүдтэй ноцолдож өсөн, ногоон дэвжээн дээр гарахдаа монгол бөхийн хамгийн хүчтэй, ширүүн өрсөлдөөнтэй үед босоо явсан Агваансамдангийн Сүхбат аварга ийм л сайхан бөх, тийм л хүндлэлтэй хүн юм байна.