Манай оронд болж буй 20 дахь удаагийн жюү жицү бөхий дэлхийн аварга шалгаруулах тэмцээнд 50 гаруй орны баг өрсөлдөж байгаа. Үүнээс Бангладеш, Кипр, Ардчилсан Конго, Индонези, Узбекистан, Словени гэсэн зургаан орон нэг тамирчнаа илгээсэн. Эдгээрээс Африк тивийн Ардчилсан Конго Улсын тамирчин Кристоф Мпуту манай оронд ганцаараа ирж “Fighting” төрлийн эрэгтэйчүүдийн -94 кг-ын жинд болон тулаан гэсэн хоёр ангилалд өрсөлдөв.

         Конго Улсын 36 настай тамирчин тэрбээр эхний өдөр “Мастерс 1” ангилалд хүрэл медаль хүртсэн бол өнөөдөр тулааны төрөлд VII байрт орж ганц дайчин ганцаарддаггүй гэдгийг харуулж тэмцээнээ өндөрлүүлэв. Кристоф Мпуту нь 2022 оны Африк тивийн аварга, Парис, Герман, Тайландын гран пригийн хүрэл медальтай шилдэг тамирчин юм.