Намрын улирал айлчлан ирлээ. Тун удахгүй навч шаргалтаж, байгаль дэлхий өнгөө сэлгэнэ. Бид ч мөн адил орчин тойронтойгоо зохицох хувцаслалтыг сонгоно. Тэгвэл энэ намрын загварын чиг хандлагын талаар стилист Н.Аранжинтай ярилцлаа.

-Сайн байна уу. Манай уншигчдад өөрийгөө танилцуулаад яриагаа эхлэх үү?

                -Энэ өдрийн мэнд хүргэе, намайг Н.Аранжин гэдэг. “Аранжин” стиль, имижийн зөвлөгөөний  компанийн үүсгэн байгуулагч, гүйцэтгэх захирлаар ажилладаг.

-Энэ намрыг загварыг чиг хандлага юу байх бол?

                -Намрын улиралд бид  гялалзсан зүйлээс татгалзана. Хувцасны материалын хувь ноос, ноолуур гэсэн дулаан материалтай хувцаснууд өнгө будагт оруулаагүй, натурал өнгөөрөө байх илүү тансаг харагдуулна.

-Намрын тренд өнгө ямар өнгө вэ?

                -Тренд өнгөнд дулаан намрын өнгө буюу улаан, шаргал, шар, бор, гүн ногоон, ягаан өнгөнүүд болон алтлаг, мөнгөлөг өнгө багтсан.

- Хувцаслалтдаа огт мартаж болохгүй чамин харагдуулах зүйл нь юу байх бол?

                -Өнгөрсөн намрын трендтэй уялдуулан төрөл бүрийн загвартай трико, урт оймснууд болон бээлий болгон өмсөх боломжтой ноосон гидрүүд тренд болно. Мөн үсний кист гэж нэрлэгддэг даруулгууд тренд болох хандлагатай байгаа.

-Хувцаснаас гадна гоёл чимэглэл ямар өнгө, загвартай байвал илүү тохиромжтой вэ?

                -Алтлаг, мөнгөлөг металлыг хослуулан хувцаслалтдаа тохируулан өмсөх хэрэгтэй. Мөн 2000 оны эхээр тренд болж байсан толгойн алчуур, саравчтай малгай буцаж ирсэн.  Энэ жилийн шинэ тренд нь зангиа. Дан ганц эрчүүд гэлтгүй, эмэгтэйчүүд олон төрлөөр хувцаслалтдаа тохируулан зүүх хэрэгтэй.

-Намрын улиралд ер нь моданаас гардаггүй, шүүгээд байвал зохих хувцаснуудыг нэрлэхгүй юу?

                -Хэзээ ч трендээс гарахгүй хамгийн сонгодог загвар буюу бор өнгийн сайн чанарын материалтай пальто болон бор, хар, ногоон өнгийн цув, урт түрийтэй гутал, бээлий, ороолт бол намрын улирлын хувцаслалтад мартаж боломгүй загвар. Монголын цаг агаарт тохирсон ноолууран, ноосон материалтай дуулан цамц үргэлж мода байх болно.

-Монголчуудын хувцаслалтдаа гаргадаг нийтлэг алдаа юу вэ?

                -Миний анзаарсан нийтлэг алдаа бол хувцасны жижиг бичиг, үгнүүд байдаг. Ямар ч бичиггүй цагаан богино ханцуйтай цамц , жижигхэн ч гэсэн бичигтэй богино ханцуйтай цамц  өмсөх нь хувцаслалт, харагдах байдалд асар их нөлөөлдөг. Мөн биеийн галбираас хамаарч хувцасныхаа материалыг сонгох хэрэгтэй. Хувцасны загвараас илүү материал маш чухал. Хувцаслахдаа өнгийн сонголтоо буруу хийдэг. Цамц, өмд, гутал, гадуур хувцас нь ижилхэн өнгөтэй байх нь биеийг цэгцтэй, өндөр харагдуулдаггүй. Эсрэгээрээ илүү намхан харагдуулдаг.

-Хувийн өнгө, имижээ олсноор тухайн хүнд хэр  их өөрчлөлт гардаг бол?

                -Хувь хүний стиль имиж гэдэг бидний дотоод сэтгэл зүй, гадаад нийгэмтэй нийлэх зааг нь болж өгдөг. Хувцаслалтаар бид өөрсдийгөө хамгаалж, илэрхийлж болдог. Мөн хувцаслалтаараа бусдад ямар илэрхийлэмж өгч байгаагаа анхаарах хэрэгтэй. Тохирсон имижээ олсноор мөнгө, цаг хугацаагаа хэмнэх боломжтой.

-Хувцаслалтыг хамгийн сайн тодруулж, чамин харагдуулдаг зүйл нь юу байдаг вэ?

                -Жижиг гоёл чимэглэлүүд, бугуйн цаг, тэлээ, гутал, цүнхний оролцоо хувцаслалтад  маш чухал байдаг. Энэ нь таны өнөөдрийн хувцаслалтыг ямар илэрхийлэмжтэй байгааг илэрхийлдэг. Гутлын өсгий намхан, өндөр байгаагаасаа хамаарч хувцаслалтыг өдөр тутмын байх уу, гоёлын байх уу гэдгийг шийддэг.

-Стилистийн хувьд ярилцлагын төгсгөлд уншигчдад өөрийнхөө анзаарсан туршлагаас зөвлөгөө өгөхгүй юу ?

                -Шүүгээний суурь буюу ямар ч бичиггүй, хэзээ ч өмсөж болохоор минимал загварын хувцас бүрдүүлэх хэрэгтэй. Дээрх хувцсанд суурилж тухайн өдрийн хувцаслалаа бүрдүүлнэ гэсэн үг л дээ. Хүмүүс суурь хувцсаа бүрдүүлж чадаагүйгээсээ болж нэг хувцас авахдаа ямар хувцастай зохицуулж өмсөхөө мэддэггүй. Мөн хувцаслалтын 50 хувь нь бидний сэтгэл зүйгээс хамаардаг. Өөрийгөө итгэлтэй болгож сул талаа нуух бус давуу талаа улам тодруулсан хувцаслалтыг сонгож сураарай гэж зөвлөмөөр байна.