Б.ЗОЛБАЯР: Хүн уудам тэнүүн санаагаар аж төрж, ухаантайгаар нэгнээ хайрлаж, өршөөх сэтгэл томтой байж язгуурын хувьд агуулгаараа том амьдардаг

2024-05-11, 1085

“Хайрын домог” киногоор уудам тэнүүн санаатайгаар аж төрж, ухаантайгаар нэгнээ хайрлахын учиг эргэцүүллийг олгохыг хичээсэн” гэж киноны зохиолч Б.Золбаяр онцолсон юм. Түүнийг бид “Бүтэн”, “Бүлээн”, “Бүгээн”, “Хүмүүн”, “Ертөнц энд” зэрэг номуудаар нь, утга найруулга дүүрэн аян замын тэмдэглэл, эсээ , өгүүллэгүүдээр нь мэдэх билээ. Тэгвэл “UBS” телевизийн ээлжит бүтээл болох буриад зоны аж амьдрал, ахуй соёл, домгийн улбааг туульсын хэлбэрээр , хүмүүний амьдралын олон талт зөрчил тэмцлээр харуулахыг зорьсон гэх “Хайрын домог” кино түүний зохиол, хэл найруулгаас бүтжээ.

Тэрбээр Хэнтий аймгийн Дадал, Биндэр, Батширээтээр явж зохиолынхоо судалгааг хийсэн бол , киноны баг хамт олон Дадал сум, Төв аймгийн Алтанбулаг, Батсүмбэр сумын нутагт кино зургаа авчээ. Ерөнхий найруулагчаар Б.Чингүүн, ерөнхий продюсер, зөвлөх найруулагч, хөгжмийн зохиолчоор Урлагийн Гавьяат зүтгэлтэн, төрийн шагналт Л.Балхжав, төслийн удирдагчаар Соёлын гавьяат зүтгэлтэн Ж.Баяр нар ажилласан байна.

Харин киноны ерөнхий зураглаачаар Д.Цэрэнчимэд, дууны найруулагчаар Э.Эрдэнэбаяр нар ажиллажээ. Гол дүрүүдийн тухайд харин Монголын кино урлагт бригадын даргаас эхлэн онгоцны нисгэгч, их зохиолч Д.Нацагдорж, Чин ван Ханддорж, Баянмөнх жононгийн дүрийг дархалсан Ардын жүжигчин Д.Гүрсэд, хөгжилтэй, хошин, цоглог зан чанараараа олон сайхан дүрийг бүтээж буй жүжигчин Т.Лхагвадулам, “Girls”, “18 нас би чамд хайртай” зэрэг киноны гол дүрд тоглосон жүжигчин Ч.Сэлэнгэ, уран нугараач Э.Лхагва-Очир, тайз, дэлгэцийн олон сайхан бүтээлд дүр бүтээсэн жүжигчин М.Тогтохжаргал, Д. Мөнхтөмөр, Бүх оросын ардын жүжигчин, Буриадын ардын болон гавьяат, залуу жүжигчдээс бүрдсэн долоон авьяастан нар ажилласан байна. “UBS” телевизийн уран бүтээлчид өмнө нь “Universe best songs” наадмаас төрөн гарсан шилдэг оролцогч залуустай хамтран “Зүрхэнд гэрэлтэх од”, “Мартагдашгүй намар-2”, “Мама мия” зэрэг мюзикл, “Содура”, “Говийн домог”, “Нарны садан” зэрэг бүрэн хэмжээний уран сайхны кинонуудыг хүргэж байсныг үзэгчид андахгүй мэдэх билээ. Удаан хугацаанд ажилласан чамбай судалгаатай чанартай бүтээлийг том багтайгаар хийдгээрээ онцлог байдаг, үзэгчдийн дунд хэдийнэ хүлээлт үүсгэх болсон тэдний ээлжит “Хайрын домог” кино энэ сарын 10-нд нээлтээ хийж, дэлгэцнээ гарч эхлэх нь. Бид тус киноны уран бүтээлчдийн хэвлэлийн бага хурлын үеэр кино зохиолыг нь бичсэн зохиолч, сэтгүүлч Б.Золбаяртай товч ярилцсаныг хүргэж байна.

-“УУДАМ САНАА, УХААНТ ХАЙР”-

-“Хайрын домог” киногоо үзэгчиддээ хүргэх гэж байгаа та бүхэнд баяр хүргэе. Таны хувьд зохиолыг нь бичсэн анхны кино нь юм байна. Анх танд кино багийнхан зохиол бичих санал тавьсан уу. Эсвэл таны бодож бичсэн зохиол ийн үзэгчдэд кино болон хүрэхээр бэлэн болов уу?

-Баярлалаа. Киноны уран бүтээлчдийн зүгээс, ерөнхий продюсер Л.Балхжав ахын тавьсан саналыг хүндэтгэн хүлээн авч, үндсэндээ сүүлийн хоёр жил “UB pictures” компанитай хамтран ажиллаж байна. Анх Балхаа ах, Д.Долгион продюсер “Мөнх хаан” түүхэн киноны зохиол дээр ажиллах санал тавьснаар Элчин сайд Г.Батсүх, Төрийн соёрхолт Ш.Гүрбазар , Соёлын гавьяат зүтгэлтэн, яруу найрагч Ү.Хүрэлбаатар ах нар бид хамтран ажилласан. Үүнд нас залуугийн хувиар гэх үү, хөл хөнгөн, үзэг довтломтгой, ер нь чамбай оролцоотой бичиж ажилласан. Мэдээж, зохиол маань яг таг бэлэн болсон ч бүтээх ажил нүсэр, санхүү үлэмж тул түр хойшлуулж, дараагийн бүтээлийнхээ ажилд орсноор “Хайрын домог” киноны зохиолыг бичиж эхэлсэн. Киноны зохиолыг ерөнхий найруулагчтайгаа, продюсертэйгээ санаа оноогоо солилцож, өөртөө нэгтгээд багахан хугацаанд бичсэн, харин хөгжүүлэлт байнга хийлээ. Ингэж ажилласан кино маань хэдхэн хоногийн дараа дэлгэцэд гарах гэж байгаад баяртай байна.

-Таны хэл найруулгыг уншигчид андахгүй шүү дээ. Тийм ч болохоор сайхан үг яриатай кино болох болов уу гэж хүлээж байна?

-Хэл найруулгын хувьд илүү дэлхэн бичих бололцоотой боловч, үзэгчдэдээ дөт, ойлгомжтой энгийн байхыг мөрдлөг болгож бичсэн. Гэхдээ киноныхоо туульслаг байдлыг хадгалж зохист монгол хэлнийхээ баялаг үгсийг аль болох дүрүүдийн агуулга, харилцан яриа, зан чанарт багтаан бичихийг зорьсон.

-Хайр сэтгэлийг илэрхийлсэн бүтээлүүд үг багатай байх нь бий. Магад “Хайрын домог” кино ч мөн тийм байх болов уу?

-Түүнийг үзээд мэдэх нь зүйтэй байх. Мэдээж хайр дурлалын бүтээл. Хүн хүнээ уудам санаагаар тэтгэж, ухаант хайраар хайрладаг байгаасай гэсэн санааг голлон дэвшүүлсэн. Ер нь ч буриад хүний хэнэггүй ч гэмээр, илтэд нэгэндээ тал засан эвийлэхгүй, цөлх агуулгат сэтгэл, нуугдмал оюун санааны цаана уудам санаа сэтгэл, ухаантай хайрлахуй оршдогоор ажиглагдах юм билээ.Тиймдээ ч “Уудам санаа , ухаант хайр” гэсэн үг, үзэл санаанд суурилан бүтээлээ хүргэж буй. Хүн уудам тэнүүн санаагаар аж төрж, ухаантайгаар нэгнээ хайрлаж, өршөөх сэтгэл томтой байж язгуурын хувьд агуулгаараа том амьдардаг гэдгийг л харуулахыг зорьсон. Үүний зэрэгцээ хайр өөрөө ухаантай байх ёстой. Хайрласан юм чинь яаж ч болно гэсэн хандлагаар нэгэндээ хандаж болохгүй. Үүнийг л өнөөдөр залуус, бидний бүтээлийг үзээд ойлгож ухаарч, нэгийг бодож санаасай билээ хэмээн бодох.

-Киноны зохиол бичиж үзье, энэ салбарт өөрийнхөө авьяас билгийг сорьё гэж та зорьж байсан уу. Энэ бүтээлээр хүсэл тань биелэж байна гэж ойлгож болох уу?

-Тийм ээ. Миний хувьд кино, жүжиг гээд аль ч төрөлд бичиж туурвих хүсэлтэй. Харин тэр хүслээ бодитой алхмаар биелүүлэхийг хичээж байсан. Тиймдээ ч киноны тодорхой туршлагатай хамт олны санал, нэгдэн хамтарсны хүчээр биелэж байгаад талархаж байна. Миний хувьд кино зохиолынхоо анхны шанг эл бүтээлээр, нэн уран бүтээлч хамт олонтой эхэлж байгаадаа сэтгэл дүүрэн байна.

-Буриад зоны ахуй соёлын тухай та энэ удаад бичлээ. Өсөж, төрсөн монгол ахуй соёлоо харуулсан бүтээлийн санаа ч таны дотор төрж л яваа байх даа?

-Тийм ээ. Өөрийн гэсэн үзэл санаа бүхий бүтээлд өөрийгөө сорих санаа бий.

-Кино зохиолоос гадна ном бүтээлийн сонин дуулгах зүйл бий юү?

-Сүүлийн жилүүдэд кино зохиолд төвлөрч ажиллалаа. “Мөнх хаан” хамтын кино зохиолоо биежээсэй гэж тун их хүсэж байгаа. Өгүүллэг, эсээ, хөрөг, тэмдэглэлээс бүрдсэн хоёр ном бэлдсэн байгаа. Удахгүй уншигчдадаа хүргэнэ.

-Таны хэл найруулга өвөрмөц, өөр байдгийн учир юунд байгаа бол. Таныг үгийн эрэлд их гардаг болов уу гэж санадаг?

-Айхтар үг эрж, бэдрэхээс илүүтэй өссөн, орчин ахуй нөлөөлсөн байх. Би чинь Ховд аймгийн Чандмань сумын хүн шүү дээ.Бага нас минь хөдөө буйд газар хүүхэд, хөгшдийн дунд, мал ахуйт нутагт өнгөрсөн болохоор тэр үеийн өвгөд хөгшид, буйд нутгийн хүн зон, улсын хэл ярианы баялаг уламжлал өвлөгдөж, оюун санаанд суурьшсантай холбоотой болов уу. Тэр суурь үг хэллэг дээр уншсан, мэдсэнээ нэмээд л ажилладаг даа.

-Киноны хүрээнд л яриа өрнүүлэхийг зорьсон учир энэ удаад ингээд яриагаа дуусгая. Танд уран бүтээлийн өндөр амжилт хүсье.

-Баярлалаа.

Б.ЗОЛБАЯР: Хүн уудам тэнүүн санаагаар аж төрж, ухаантайгаар нэгнээ хайрлаж, өршөөх сэтгэл томтой байж язгуурын хувьд агуулгаараа том амьдардаг

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 5

Сэтгэгдэл үлдээсэн: 2024-05-11 10:13:00

Тлл: Сүр сүр гарчигтай ярианууд өгөх юмаа пидда
Сэтгэгдэл үлдээсэн: 2024-05-11 10:13:00

Тлл: Сүр сүр гарчигтай ярианууд өгөх юмаа пидда
Сэтгэгдэл үлдээсэн: 2024-05-07 07:45:25

Зочин: Үзээгүй байж л кинонцорууд гэх юм даа. Сэтгэл зүрхээ уужим байлгаж сурахгүй бол сэтгэцийн өвчин болно шүү. Миний бодлоор сайн кино шиг санагдаж байна. Үзнэ ээ.
Сэтгэгдэл үлдээсэн: 2024-05-07 07:18:33

Зочин: Ямарч утга учир үгүй хүнд өгөх юмгүй кинонцорууд хийхээ боль
Сэтгэгдэл үлдээсэн: 2024-05-07 07:17:54

Зочин: Ямарч утга учир үгүй хүнд өгөх юмгүй кинонцорууд рийхээ боль

Шинэ мэдээ

Нийтлэлчид