Эх, хүү хоёрыг өвлийн тэсгим хүйтэнд халаад, углааштай ХӨСҮТ рүү тээвэрлэсэн явдал монголчуудын бухимдлын галыг асаахын чацуу энэ бүх шударга бус байдалтай тэмцэх хүчийг өгсөн. Ийм ч учраас хэн ч хэлж, уриалаагүй байхад талбай дээр олон мянган хүн цугларч, зүй бус үйлдлийнхээ төлөө холбогдох албан тушаалтнуудыг хариуцлага хүлээхийг шаардсан. Энэ тэмцэл ч үр дүндээ хүрч, Шадар сайд, УОК-ын дарга Я.Содбаатар болон Эрүүл мэндийн сайд Т.Мөнхсайхан нар ажлаа өгөхөө мэдэгдсэн. Харин одоо Засгийн газар бүрэлдэхүүнээрээ огцрох дээрээ хүрээд байна.

Гэвч өнөөдөр салбараасаа төрсөн ганц сайдаа авч үлдэх гэсэн эмч нарын жагсаал талбай дээр өрнөж эхэллээ. ЭМЯ-наас эмч, ажилчдыг жагсахыг уриалж, үүрэг өгсөн гэх албан бус мэдээлэл олон нийтийн сүлжээгээр тархаад байна. Гэхдээ сайдыгаа ажлаа өгөх хүртэлх хэмжээнд хүргэсэн хүмүүс нь энэ салбарынхан өөрсдөө. Хэрэв ажлаа мэддэг, үүргээ ухамсарладаг эмч, ажилтан, сувилагч байсан бол эх, хүү хоёрыг тийм байдлаар тээвэрлэхгүй байсан юм.

Иргэдийнхээ эрүүл энхийг сахин хамгаалах үүрэг хүлээсэн ч өнөөдрийг хүртэл үүргээ ухамсарладаггүй, мөнгөтэй, танилтайд нь үйлчилдэг эрүүл мэндийн салбарын гаж тогтолцоог засахад ганц сайд нь ч ажлаа өгөөд хангалтгүй. Удирдах албан тушаалтнууд, үүрэг хариуцлага хүлээсэн хэн бүхэн уучлал гуйж, энэ ёс бус үйлдлээ зогсоох хэрэгтэй. Ийм үйлдэл гаргасныхаа төлөө ичих ёстой байтал салбарын сайдаа авч үлдэхийн төлөө жагсаж байгаа нь эмч, эмнэлгийн ажилтнуудыг ямар увайгүй, сул дорой, ичих булчирхайгүй гэдгийг илтгэж байна.

Өнөөдөр эмнэлэг өөрөө хамгийн эрсдэлтэй, голомттой бүс болчихоод байхад хүнээ үзэж, өвчтөнөө эмчилж байх ёстой эмч талбай дээр сайдаа авч үлдэнэ хэмээн зогсох нь хэр ёс зүйд нийцэх вэ. Эмч хүний үүрэг бол өвчинд нэрвэгдсэн хүнийг эмчилж эдгээх. Тэрнээс ямар нэгэн албан тушаалтныг аварч хамгаалах үүрэг тэд хүлээгээгүй.