Есдүгээр сарын 1-н гэдэг сурагч бүрийн догдолж, хоног тоолон хүлээдэг өдөр. Зуны амралтаа хэрхэн өнгөрүүлснээ, хэнээс илүү өндөр болсон талаараа, шинэ сурсан зүйл, өөрчлөгдсөн зүйлсийн талаар ам уралдан ярилцаж, өдөржин багачууд, залуусын инээд цуурайтдаг өдөр. Ийм л нандин өдрийг илүү гэрэл гэгээтэй дурсамжтай болгож, ангиа чимж, шавь нартаа бэлэг бэлддэг “Шинэ зууны удирдагч” олон улсын сургуулийн бага ангийн багш Ж.Мөнхзултай ярилцлаа. Тэрбээр 11 дэх жилдээ багшилж байгаа бөгөөд сүүлийн таван жил хичээлийн шинэ жилийн өдөр шавь нартаа гэнэтийн бэлэг барьдаг болсон гэнэ. 

-Танд шинж хичээлийн жилийн мэнд хүргэе. Есдүгээр сарын 1-нд шавь нартаа бэлэг бэлдэж, ангиа тохижуулан угтдаг юм байна. Яагаад ингэж бэлддэг болсон юм бэ?

                - Би боловсролын салбарт 11 дэх жилдээ ажиллаж байгаа. Сүүлийн таван жил шавь нарынхаа анги дэвших баярын өдрийг илүү онцгой болгохыг хүсэн ангиа чимэглэж, бяцхан гарын бэлэг бэлддэг болсон. Есдүгээр сарын 1-н бол зөвхөн хүүхдүүдийн бус багш нарын ч баярын өдөр. Хамгийн их ач холбогдол өгч бэлдэх өдөр юм шиг санагддаг юм. Тэр дундаа нэгдүгээр ангид орж байгаа хүүхэдтэй эцэг эхчүүд энэ өдрийг баярын өдөр шиг өнгөрүүлж, нандин дурсамж бүтээдэг байгаасай гэж хүсдэг. Бидний хувьд нандин баярын өдөр учраас шавь нараа баярлуулдаг даа.

-Бусад ангиудаас илүү дурсамжтай хичээлийн жилийг угтдаг юм шиг санагдлаа. Шавь нар нь чимэглэсэн ангиа, бэлгээ хараад багшдаа юу гэж хэлдэг вэ?

                -Хамгийн анхны жил хүүхдүүд ангидаа орж ирээд ширээн дээрээ байгаа бэлгийг хараад баярлаж, догдолсон. Дараагийнх нь жилээс “Багш ангиа яаж чимэглэсэн бол, юу бэлдсэн бол” гэж догдлолтой сургуульдаа ирдэг болсон гэсэн.

-Маргааш /өнөөдөр/ хичээлийн шинэ жил эхэлж байна. Энэ удаа ангиа ямар онцлогтой чимж,  бэлэг бэлдэв?

                -Жил бүр ангийн чимэглэл өөр байдаг. Өмнө жилийнхээ чимэглэлийг огт давтдаггүй, хүүхдүүддээ гэнэтийн бэлэг барьж байгаа учраас. Энэ жилийн хувьд номын тавиур, үзэг харандаа сав гутлын хайрцаг, түлхүүрийн оосор гээд хүүхдүүдэд хэрэгтэй, мөн ангийг жигдрүүлсэн бэлэг бэлдсэн. Гэрийнхэнтэйгээ хувааж идэх чихрийн цуглуулга, гадаа жагсаж байгаад орж ирэх учраас уух зүйл бэлдсэн.

-Хүмүүс эерэг зүйлээс үлгэр дуурайлал авдаг шүү дээ. Тантай адил ангиа чимж, бэлэг бэлдээд шавь нараа хүлээж авдаг багш нар байдаг болсон уу?

                -Бэлэг бэлдэж, ангиа бэлдээд хүүхдүүдээ хүлээж авахдаа ач холбогдол өгдөг болоод таван жил болж байгаа. Ер нь бүх л багш нар шавь нараа хүлээн авахад бэлдэж, ангиа тохижуулдаг. Шавь нараа баярлуулахыг дор бүрнээ зорьдог.

-Таны хувьд анх яагаад багш мэргэжлийг сонгосон юм бэ. Тэр дундаа бага ангийн багш болсон шалтгаан бий юү?

                -Хүүхэд байхын багш болохыг хүсдэг байсан. Хүсэл мөрөөдлийнхөө дагуу сургуулиа төгсөөд эргэлзэлгүйгээр багш мэргэжлийг сонгосон. Эгч минь багш, эгчтэйгээ адилхан мэргэжлээр ажилладагтаа баярладаг. Багш гэх эрхэм алдрыг хүртэж, чухал үүрэгтэй ажил хийдгээрээ өөрөөрөө бахархдаг шүү. Хамгийн зөв мэргэжлээ сонгосон гэж боддог доо.

-Залуу багшийн хувьд ямар багш байхыг эрмэлздэг вэ?

                -Бүх хүүхдүүдийн авьяас чадварыг дэмждэг байхыг хичээдэг. Эрдэм мэдлэгтэй, хүмүүжилтэй, цэвэрч нямбай, хариуцлагатай, хичээнгүй, тусч сайхан сэтгэлтэй нэгэн болгож, төлөвшүүлэхийг, хөгжүүлэхийг хичээдэг. Өөрөө ч үлгэр дуурайлал болохыг эрмэлздэг. Урлагийн үзлэг боллоо гэхэд ангиараа бүжиглэж, дуулдаг. Нэг ч хүүхдийг хоцрогдолгүй сургахыг зорьдог. Авьяасгүй хүүхэд гэж байхгүй багаас нь суурийг нь зөв тавьж, чиглүүлэх хэрэгтэй. 

-Шавь нартаа зориулан сурах бэлдэц хийдэг гэсэн. Энэ талаараа ярихгүй юу, тун бүтээлчээр ажилладаг юм шиг санагдсан юм?

                -Үзүүлэн, хэрэглэгдэхүүнийг өөрөө хичээлийнхээ агуулгад тааруулж, бэлддэг. Орчин үеийн хүүхдүүдэд хэрэглэгдэхүүнгүйгээр хичээл заах боломжгүй санагддаг. Багш өөрөө тасралтгүй хөгжиж, хүүхдүүдэд тухайн хичээлийг ойлгуулах эрэл хайгуул хийж хичээлээ бэлдэж, төлөвлөдөг. Хүүхдүүдийн нас, сэтгэхүйд тохируулж, тараах материал, үзүүлэн бэлддэг. 

-Сурагч, оюутан, багш гээд энэ бүх цаг үеэс хамгийн мартагдашгүй есдүгээр сарын 1-н хэзээ байсан бэ?

                -Есдүгээр сарын 1 бүр дахин давтагдашгүй өнгөрдөг, онцгой өдөр байдаг. Жил бүр шавь нараа анги дэвшиж, том болж байгааг нь харах сайхан байдаг даа.