Тэр хамгийн том ах. Дүү нартаа үргэлж сайныг хүсдэг, түүнийхээ төлөө хөдөлмөрлөж байгаа. Хэдий түүний хийж байсан бүх зүйл зөв биш байж болох ч эцсийн үр дүн нь дүү нараа сайхан амьдруулах. Эгчийнхээ захиасыг биелүүлэх. Тэр бол "Гарц" олон ангит киноны том ах Бархас. Үзэгчдэд Бархас хэрхэн энэ бүх асуудлыг шийдвэрлэх нь хамгийн сонирхолтой байна. Ингээд Бархасын дүрд ажилласан жүжигчин Ц.Даваанямтай ярилцсанаа хүргэж байна.

-“Гарц” Олон ангит кино үзэгчдийн хүртээл болж эхэллээ. Бархасын дүрд ажилласан сэтгэгдлээсээ хуваалцахгүй юу?

                -Бархасын дүрд ажилласан саналыг 2023 оны долдугаар сард хүлээж авсан. Найруулагчтайгаа ярилцаж байгаад саналыг наймдугаар сард хүлээж авсан. Хувиараа бизнес эрхэлдэг учраас ажлынхаа төлөвлөгөөг зохицуулах гэж жаахан удсан юм. “Гарц” олон ангит киноны зураг авалтын бэлтгэл ажил есдүгээр сараас эхэлсэн. Харин зураг авалт маань 2023 оны аравдугаар сард эхэлж 2024 оны гуравдугаар сар хүртэл үргэлжилсэн. Тус киноны ард олон хүний хүч хөдөлмөр шингэсэн. Уран бүтээлээ үзэгчдэдээ хүргэж эхэлсэндээ баяртай байна.

-Бархасын дүрийг өөрийнхөөрөө тодорхойлбол та ямар хүн гэх бэ?

                -Анх зохиол дээрх Бархастай танилцахад надад хүмүүсийн  ярьдгаар хор нь гарчихсан, юм үзэж, нүд тайлсан залуу шиг санагдсан. Тийм л төрх нүдэнд буугаад байсан. Нүд тайлсан гэдэг нь гадаадаар явсан, олон зүйл мэддэг гэсэн утгаар бус зовлон үзсэн, амьдралын сайн, мууг ойлгочихсон учир мэддэг, ухаан суусан гэсэн утгаар. Хүний төлөө байх, бусдыг хайрлах, бусдад чин сэтгэлээсээ ханддаг дүр гэж ойлгож ажилласан. Би өөрийнхөө дотор Бархасыг тэгж л төсөөлсөн.

-Олон ангит кинонд ажиллах уран бүтээлчээс их чадвар, тэвчээр шаардсан байх даа?

                -Тийм ээ, олон хүнээс хөдөлмөр, хичээл зүтгэл шаардсан бүтээл боллоо. Жүжигчид зураг авалттай үедээ ирж, ажлаа хийчихээд яваад өгнө. Зураг авалтын туршид арын албанд ажилладаг, гүйцэтгэлийг багууд хамгийн их хөдөлмөрөө шингээсэн. Тэдэндээ баяр хүргэж, талархаж байгаагаа хэлмээр байна.  Тэдний хөдөлмөр, хичээл зүтгэлийн ачаар энэхүү кино үзэгчдэд хүрч эхэллээ.

-Бархасын дүрийг гаргахад танаас юу шаардаж байв?

                -Энэ асуултад хариулахаасаа өмнө үзэгчид найруулагч, нийт уран бүтээлчидээсээ хүлцэл өчмөөр байна. Учир нь, найруулагч маань энэ киноны зохиолыг бичихдээ Бархасын дүрд намайг ажиллуулна гэж бодож бичсэн гэж хэлж байсан юм. Тэр ч утгаараа зохиолоо уншихад надтай их ойрхон, амархан юм шиг санагдаж байсан. Гэтэл бодит байдал СУИС-ийг 2013 онд төгссөнөөсөө хойш мэргэжлээрээ ажиллаагүй болоод тэр үү удаан хугацааны дараа уран бүтээлд орж ажиллахад миний төсөөлснөөс огт өөр, хэцүү байлаа. Уран бүтээлч хүн байнгын бэлтгэлтэй байх ёстой гэдгийг маш сайн ойлгож авлаа. Сэтгэлд нь хүртэл дүр дээрээ ажиллаж чадаагүйд намайг уучлаарай.

-Ажилласан анхны гол дүр нь байв уу. Өмнө нь ажиллаж байсан кино, уран бүтээлүүдийнхээ талаар яривал?

                -Миний ажилласан анхны гол дүр байлаа. СУИС-ийг төгссөнийхөө дараа “Black zebra” Pictures-д байхдаа “Үргээлэг”, “ТюТю”, “Аав”, “Босуул” зэрэг киноны зураглаачийн туслахын багт ажиллаж байсан. 2021 оноос “Фантастик” продакшнд найруулагчийн туслахаар ажилласан. 2023 оноос “Falco” энтертайнментийн анхны уран бүтээл “Миний үзэсгэлэнт дагуул” киноны гол дүрийн залуугийн ахын дүрд ажилласан. Бархас бол миний ажилласан анхны гол дүр.

-Яагаад жүжигчин болохоор шийдсэн юм бэ?

                -Жүжигчний мэргэжлийг сонгохдоо гүн утга агуулга гэхээсээ илүү урлагийн хүмүүсийн гоё сайханд нь татагдаж сонгож байлаа. Эргээд харахад жүжигчин болсондоо их баярладаг. Миний мэдэх хамгийн гэгээлэг ертөнц.  Цаашид жүжигчнээр ажиллахгүй байсан ч багш нараасаа, урлагийн салбараас сурсан бүхэн миний амьдралд үргэлж гэрэл нэмж, сайн сайхан руу хөтөлнө гэдэгт итгэлтэй байна.

-Адал явдал, зодоонтой кинонд тоглох ямар байв. Танаас ямар ур чадварыг шаардав?

                -Анх зохиолоо уншаад төсөөлөхөд сэтгэлд багтаж, хийж болохоор санагдаж байсан. Гэхдээ яг зураг авалтын талбайд гарахад үнэхээр хэцүү юм билээ. Ур чадвар, хөдөлмөр, гүйцэтгэл шаардсан хэсгүүд байсан. Магадгүй өөрийнхөө түвшнийг мэдэрч, илүү их хичээх ёстойгоо ойлгосон.

-Дэлгэцээр өөрийгөө үзэх ямар байдаг бол. Залуу уран бүтээлчийн хувьд сонин зүйлийн нэг болов уу?

                -Дэлгэцээр өөрийгөө харах ёстой эвгүй юм билээ. Үнэхээр авч болох хамгийн эвгүй мэдрэмж. Өөрийнхөө бүх талын дутагдалтай талыг олж хардаг юм билээ.

-Уран бүтээлийн багийнхныхаа талаар ярихгүй юу?

                -Урт хугацааны зураг авалт учраас олон хөгжилтэй, сайхан дурсамжуудыг бүтээсэн. Хийж бүтээе гэсэн эрмэлзэлтэй залуусаас олон зүйл сурсан. Багийнхандаа бүгдэд нь баярлалаа.

-Ирээдүйд олон сайхан дүрд ажиллах  байх. Ажиллахыг хүсдэг дүр бий юү?

                -Монгол хүн учраас ч тэр юм уу, түүхэн кинонд ажиллахыг хүсдэг. Би өөрөө сайн хөдөлмөрлөж, хичээж чадвал мөрөөдөл минь биелэх байх.

-“Гарц” киногоор юуг илэрхийлэхийг хүссэн бол. Таны хувьд тус киног үзэх шалтгаан хэлээч гэвэл ямар шалтгаан хэлэх вэ?

                -Уран бүтээлчид хамтарч нийгэмд болохгүй байгаа асуудлуудыг шүүмжилж, егөөдөхийг хичээсэн. Магадгүй зарим уран бүтээлүүд дээр дурдагдаж байгаагүй асуудлыг хөндөж гаргахын хичээсэн. Найруулагч, зохиолчийн маань эмзэглэл дээр бий болсон уран бүтээл. Найруулагч маань нүд хуурсан зүйл нэгийг ч хийхийг хүсээгүй. Жижигхэн чимхлүүр зүйл ч анхааралтай, сэтгэл гаргаж ажилласан. Тэр бүр нь “Гарц” олон ангит киног үзэх шалтгаан юм болов уу. Анги бүр нь нэг ангит кино шиг гүйцэтгэлтэй болсон гэж найдаж байна.