Тэр багаасаа бяртай хүүхэд байжээ. Тамирчин болно гэж бодоогүй ч өөрийгөө байнга сорьдог өрсөлдөөнд дуртай хүүхэд байж. Ааваасаа чиглэл авч, ахаараа хөтлүүлээд "Хилчин" спорт хорооны хаалгаар тамирчин болохоор орж байсан тэр өдгөө Монголын жюү жицүгийн залуухан од, ирээдүйтэй тамирчнаар нэрлэгдэх болжээ. Тэр гэдэг нь Азийн наадмын мөнгөн медальт, жюү жицүгийн тамирчин Г.Монголжин. 2016 оны олимпын наадмаар Д.Сумъяа гавьяатын барилдааныг үзээд тэр тамирчин болохоор эргэж буцалтгүй шийдсэн гэнэ. Тэр өөрийнхөө чадвар, нөөц боломжийг бүрэн харуулах төрлөө олохын тулд жүдо, кураш, самбогоор хичээллэж байжээ. Г.Монголжин "Жүдогоор хичээллээгүй бол хэзээ ч жюү жицүгийн дэвжээг олохгүй, сонирхохгүй, онцлогийг нь мэдрэхгүй байсан" гэсэн юм. Ингээд ирээдүй нь гэрэлтэж буй залуу тамирчин Г.Монголжинтой ярилцсанаа хүргэж байна.
-Ази тивийн аварга шалгаруулах жюү жицүгийн тэмцээний мөнгөн медаль хүртсэнд баяр хүргэе. Сэтгэгдлээсээ хуваалцахгүй юу?
-Аваргын төлөө өрсөлдсөн гэдэг утгаараа миний хувьд баяртай байлаа. Тоглоомын дүрмийн дагуу зарим нэг нүүдлийн зөрүүгээр ялалт, ялагдлаа авсан. Гэсэн ч бэлтгэлийн үйл явц, өсөлт хөгжлийг харж болох маш сайхан туршлага байлаа. Жюү жицүгийн -57кг жинд шинэ түүх эхлүүлж байгаагийн хувьд шинэ өрсөлдөгчидтэй нүүр тулах, өөрийн бие сэтгэл зүйн тал дээрх өөрчлөлтүүдийг харах, бүхэлдээ шинэ сорилтоор дүүрэн тэмцээн болж байна.
-Аваргын төлөөх барилдаан ямар болж өнгөрсөн бэ?
-Аваргын төлөө Казакстан Улсын тамирчин Галина Дувановатай барилдсан. Мэдээж -57кг жингийн тамирчидтай өмнө нь барилдаж байгаагүй учраас учраа бүр шинэлэг байсан. Галинагийн хувьд энэ жингийн финалын тааварт үргэлж байдаг тамирчдын нэг, Азийн дөрвөн удаагийн аварга. Урт мөчтэй, бяртай тамирчин санагддаг. Гэхдээ би бас өөрийнхөө онцлогийг мэддэг учраас өрсөлдөгчийн давуу талуудыг төдийлөн чухалчлаагүй. Мэдээж анхаарах зүйлсээ анхаараад өөрийн барилдааныг гаргахыг зорьсон. Агуулгын хувьд миний барилдаан гарсан ч онооны зөрүүгээр хожигдсон. Цаашдаа олон таарна даа.
-Багш, дасгалжуулагчийн заавар зөвлөмж амжилт гаргахад нөлөөлдөг шүү дээ. Багш нарынхаа талаар ярихгүй юу. Чухал барилдааны өмнө багш нь юу гэж зөвлөдөг вэ?
-Олон ч хүмүүс надад цагаа зарцуулсан, зарцуулсаар байгаа. Бүгд надад итгэж, миний онцлогийг бодолцож, хэрэгтэй цагт хэрэгтэй зөвлөгөө өгдөгт баярладаг. Манай багийн ахлах дасгалжуулагч Б.Ариунцог багш маань яг дэвжээнд авч гардаг. Ямар сэтгэл хөдлөлтэй, ямар үгээр миний олж хараагүй өнцгийг хэлж өгөх вэ гэдгээ сайн мэддэг. Олон тэмцээнд явах тусам баг бие биенээ мэдэрч, оновчтой дасгалжуулалттай болж сайжирсаар байгаа. Яг энэ тэмцээнд зориулж бол манай Гаруда академийн багш нар голчлон бэлтгэсэн. Т.Мөнх багш маань бидэнд зориулж хэдэн сарын өмнөөс төлөвлөгөө гарган бэлдсэн. Зарцуулж буй цаг, сэтгэл бүхнээр нь эдгээр хүмүүс бидэнд ямар их итгэл найдвар тавьж байгааг нь харж болно. Бид ч мөн түүнийг нь алдахгүйг хичээж энэ тэмцээнд л гэхэд бүгд өөрийн ахиц, бэлтгэлийн цагийн үр дүнгээ харуулж чадсан гэж бодож байна.
-Өмнөх тэмцээнүүдээс ялгаатай зүйл нь юу байв?
-Азийн аваргын хувьд өмнөх жилүүдээс илүү өргөн бүрэлдэхүүнтэй ирсэн учраас маш хүчтэй санагдаж байгаа. Залуучуудын анхны Азийн аваргын тэмцээн болж байгаа болохоор илүү өргөн хүрээтэй боллоо. Монголын баг анх удаа насанд хүрэгчдийн амжилтаараа эхний гурван байрт жагслаа. Энэ бол ямар хүчтэй, ямар өсөлттэй байгааг харуулж буй маш их урам зориг өгсөн үйл явдал юм л даа. Мөн миний хувьд өмнөх бүх тэмцээнүүддээ зооны аварга дээр ялагдаад байсан бол энэ даваагаа давж аваргын төлөө өрсөлдсөн нь бас нэг хувийн амжилт болж байгаа юм.
-Хэзээнээс жюү жицүгийн спортыг сонирхож хичээллэх болсон бэ. Хэн таныг бэлтгэлийн заал руу хөтөлж байв?
-Би спортод сонирхолтой хүүхэд байгаагүй ч хаа явсан газраа өөрийгөө сорих, батлах, өрсөлдөх дуртай л байсан байгаа юм. Том болоод өөрийгөө бяртайгаар мэдрээд эхэлсэн чинь аав бид хоёр намайг барилдуулж сорих хүсэлтэй болсон байсан. Би ч бас нэг л чадчих юм шиг санаанд багтаад л байдаг байлаа. Тэгж байтал 2016 оны олимпоор Д.Сумъяа эгчийн амжилтаар жүдогийн спорт охидын анхаарлыг татсан. Би ч тэр эгнээнд байж жүдогоор өөрийгөө сорих хүслээр 2016 онд аавынхаа заасан Хилчин спорт хорооны дэвжээнд ахаараа хөтлүүлэн очсон юм. Жүдогийн дэвжээнд гараагүй бол хэзээ ч жюү жицүгийн дэвжээг олохгүй, сонирхохгүй, онцлогийг нь мэдрэхгүй байсан гэж боддог. Тэнд би багахан хугацаанд спортуудын уур амьсгал, соёлын ялгааг ойлгосон. Жүдо, кураш, самбо, жюү жицү гээд олон тэмцээнд орж үзсэн. Тэр дунд л жюү жицүгийн уур амьсгал, соёлын ялгаанд нь татагдан хичээллэж эхэлсэн.
-Таны хувьд жюү жицү ямар байр суурийг эзэлж байна?
-Энэ спортоор хичээллээд зургаан жил болжээ. Оюутан болоод жюү жицүгээр хичээллэж эхэлсэн болохоор яг л мэргэжилтэйгээ хамт амьдралд бэлтгэгдсэн. Зөвхөн амжилт, спорт гэдгээс гадна жюү жицү ямар ач тустай, ямар утга учиртай вэ гэдгийг таньж мэдэх, түүнийг бусдад түгээх нь энэ спортоор хичээллэдэг хүн бүрийн сэтгэл зүрхэнд байдаг нэг гоё зүйл. Тэдний нэг адилаар би цаг хугацаагаа зориулсан зүйлийнхээ үр шимийг хүртэх, түүгээр дамжуулан цаашдын алхмуудаа хийх зорилготой байгаа учраас миний одоогийн амьдралд байр сууриа урдуур эзэлж байна даа.
-Анхны тэмцээнийхээ талаар дурсвал. Анхны тэмцээндээ хэр амжилттай оролцсон бэ?
-Би анхны тэмцээндээ их одтой оролцдог. Анх ямар ч спорт, бэлтгэлийн мэдлэггүй байхдаа самбогийн дүүргийн аваргад орж яаж ялсан, яаж ялагдсанаа ч мэдэхгүй мөнгөн медаль авч байсан. Анхны жюү жицүгийн тэмцээнээсээ хүрэл медаль хүртсэн. Анхны жюү жицүгийн олон улсын тэмцээнд ч бас хүрэл медаль хүртэж байсан. Тэр ялалт ялагдлын хачин сонин өвдөлттэй бас амттай мэдрэмжүүд цааш хөтөлсөн байх.
-Таны хувьд дэвжээн дээр гарахаасаа өмнө заавал хийдэг зуршил бий юү?
-Би дэвжээнээс адис авч гардаг зуршилтай. Сүсэг бишрэл гэхээсээ илүү хүндлэл үзүүлж өөрийн хувьд дэвжээгээ бүрэн мэдрэх гэж хийдэг. Мөн барилдааны дохио эхлэхэд өрөлт авч дэвжээгээ тойрдог юм байна. Тэр ч мөн дэвжээгээ өөрийн болгох гэж л хийгддэг үйлдлүүд юм байна.
-Оролцож байсан хамгийн дурсамжтай тэмцээнийхээ талаар ярихгүй юу. Онцолж байгаа шалтгаан нь юу вэ?
-Тэмцээн бүр өөрийн гэсэн онцлогтой, дурсамжуудтай байдаг даа. Хамгийн их хэцүү мэдрэмж авсан тэмцээнүүд магадгүй бас илүү тод үлддэг ч байж мэднэ. Яг одоо гэхэд энэ тэмцээн маань миний хувьд тодоор үлдэнэ.
-Таны хамгийн хүчтэй өрсөлдөгч хэн бэ. Тамирчид өрсөлдөгчөөсөө олон зүйл сурдаг шүү дээ?
-Би өрсөлдөөнч хандлагатай болохоор өөрөөсөө илүү хүмүүсээс суралцах дуртай. Өдөр тутамдаа бол өөртэйгөө байнга тэмцэлдэж өчигдрийн “би”-ээс илүү байх ёстой гэж явдаг. Мэдээж үр дүнг нь ч хэмжиж болохуйц байдаг. Гэхдээ бас над шиг хүнд бодит, хажууд харагдах өрсөлдөгч байвал илүү үр дүнтэй гэдгийг ойлгоод байгаа. Өмнө нь тухтай бүсээ бодоод өөртэйгөө өрсөлдөөд байдаг байсан бол одоо хэн нэгэн надаас илүү хийгээд, хичээгээд байгаа хүнийг харж хэцүүг мэдрэхээс зугтахгүй байя гэж боддог болоод удаагүй байгаа. Яг нэг хүчтэй өрсөлдөгч гэж байхгүй. Бүгд адилхан бэлтгэл хийж байгаа учраас байнга урд хойноо гарна. Тиймээс хийх ёстойгоо таслалгүй, өөрөөсөө илүү байгаа бүгдтэй өрсөлдөнө.
-Амжилт гарахад юу хамгийн их нөлөөлдөг вэ. Тамирчин хүний хувьд сэтгэл зүйгээ хэрхэн бэлддэг вэ?
-Спортоор хичээллээд нэг зүйлийг ойлгосон нь “Хийж л байгаа цагт үр дүн нь заавал гардаг” гэдэг. Хэдий чинээ цаг, сэтгэл, ухаан зарцуулна тэр хэрээр сайн муу, их бага үр дүн заавал гардаг. Тамирчин хүн бол илүү нарийн, үйлдэл бүрээ үр дүнтэй байлгаж чадаж байж амжилтаа авдаг гэж ойлгодог. Яагаад гэвэл бусад зүйлстэй харьцуулахад илүү их үр бүтээмжээр илүү богино хугацаанд үр дүнд хүрэхийг зорьж байгаа учраас, бүгд цаг хугацаатай шүү дээ. Тиймээс мэргэжлийн тамирчдын ертөнцөд бол юу бодох вэ, юу сонсох вэ, юу идэх вэ, юу үйлдэх вэ гээд бүгд нарийн төлөвлөгөөтэй байдаг юм билээ. Сайн бэлтгэгдсэн хүн өөртөө итгэлтэй байдаг. Тэр бүгд бүрдэж байж сэтгэл зүй бэлэн болдог. Алдаж онож байж суралцдаг, туршлага хуримтлуулдаг. Ойлгож байгаа санаа нь ийм. Энэ нь би ийм гэсэн үг биш ч ийм байгаасай гэж хуваалцаж байгаа нь юм.
-Таны дараагийн зорилго төлөвлөгөө юу вэ?
-Дараа дараагийн тэмцээнүүд байгаа, тэр бүгдэд төлөвлөгөөний дагуу оролцоно. Мөн миний хувьд хэлний мэдлэгээ ахиулах тал дээр анхаарлаа хандуулж байгаа учраас цагаа илүү их зарцуулна. Тамирчин хүн хамгийн элит, олон талын мэдлэгтэй, ур чадвартай байж нийгэмд эерэг үлгэр дуурайлал үзүүлээсэй гэж хүсдэг. Тэдний нэг байхын тулд хичээж байна. Мөн сонирхуулахад энэ оны долдугаар сард Монгол Улсад Зүүн Азийн аварга шалгаруулах тэмцээн зохион байгуулагдана. Би Монголын Жюү Жицүгийн Холбоонд ажилладаг учраас энэ тэмцээний арын албанд мөн ажиллана. Энэ тэмцээнээрээ дамжуулж эх орноо сурталчлах, спортоо таниулах нь бас нэг дараагийн зорилтот ажил болж байгаа юм.
| Г.МОНГОЛЖИН: АЗИЙН АВАРГА ШАЛГАРУУЛАХ ТЭМЦЭЭНЭЭС МӨНГӨН МЕДАЛЬ ХҮРТСЭНДЭЭ БАЯРТАЙ БАЙНА |
|
.jpg)
.jpg)
.jpg)
