“Хайр гэдэг хэн нэгнийг байгаагаар нь хайрлах зөвшөөрөл юм даа” гэж Төрийн шагналт, Соёлын гавьяат зүтгэлтэн Дармын Батбаярын зохиолчийн “Хайрыг хайрла” жүжгийн Гэрэлээ хэлдэг юм. Гэрэлээ бол хэн нэгнийг чин үнэнчээр хайрлаж, бүхнээ зориулсан ч хайртай гэх үгээр нөгөө хүнээ гинжилдэггүй ухаантай эмэгтэй. Ийм Гэрэлээгийн дүрд Хүүхэд, залуучуудын театрын жүжигчин Х.Азбуян ажилласан билээ. Түүнийг үзэгчид “Admin Z”, “Өөдлөх улирал”, “Хүүхнүүд” зэрэг киноны гол болон туслах дүрд ажилласнаар нь мэдэх билээ. Ингээд залуу жүжигчин Х.Азбуянтай ярилцсанаа танд хүргэж байна.

-Танд энэ өдрийн мэнд хүргэе. Хүүхэд, залуучуудын театр удаан хугацааны дараа “Хайрыг хайрла” жүжгээр үүд хаалга аа нээлээ. Уран бүтээлчийн хувьд сэтгэгдлээсээ хуваалцахгүй юу?

                -Хүүхэд, залуучуудын театр 27 жилийн дараа Сонгинохайрхан дүүрэгт шинээр баригдаж Төрийн шагналт, Соёлын гавьяат зүтгэлтэн Дармын Батбаярын зохиолчийн “Хайрыг хайрла”, Н.Сүхдорж зохиолчийн “Арслан хүлэгт баатар” хүүхдийн жүжгүүдээрээ амжилттай нээлээ. Шинэ театртаа олон хүүхэд, залуучуудад оюуны хөрөнгө оруулалт хийх уран бүтээлүүдээрээ бид бэлэг барих болсондоо үнэхээр баяртай байна.

-Гэрэлийн дүрд ажиллах болсон сэтгэгдлээсээ хуваалцахгүй юу. Бэлтгэлийн явцад тус дүрд тоглохыг хүссэн гэсэн. Гэрэлээгийн дүрийн юу нь таалагдсан юм бэ?

                -Жүжигчний хувьд театрынхаа нээлтийн жүжигт дүр авсандаа их баяртай байсан. Хэдий баяртай байсан ч ард нь маш том хариуцлага хүлээж байгаагаа ойлгосон. Эмэгтэй хүний тэсвэр тэвчээр, ухаан, хайр сэтгэлээ нандигнан үлдсэн чанар нь Гэрэлээгийн дүрд дурлах шалтгаан болсон.

-Уянгын драмын жүжигт тоглосон туршлага байсан уу. “Хайрыг хайрла” жүжиг танаас жүжигчний ямар чадварыг шаардаж, сорьсон бэ?

                -Мэргэжлийн сургууль төгсөөд ажилласан хамгийн анхны уянгын драмын жүжиг байлаа. Жүжигчдийн дотоод мэдрэмж, үнэн харилцаа их шаардсан. Энэ жүжигт бидэнтэй Төрийн соёрхолт, Урлагийн гавьяат зүтгэлтэн Н.Наранбаатар найруулагч ажилласан нь  хамгийн бахархмаар, их зүйлийг суралцсан үйл явдал байлаа.

-“Шинэ үе” продакшнд ажиллаж байсан юм билээ. Тус продакшнд хөл тавьж байсан үеэ дурсвал?

                -“Шинэ үе” продакшнд анх 2020 онд орж байлаа.  Хүндэлж явдаг уран бүтээлчидтэйгээ нэг хамт олон болоод дөрвөн жил ажилласан. Энэ хугацаанд тэднээсээ их зүйл сурч, мэдсэн сайхан жилүүд байсан.

-Гэрэлээ хэн нэгийг тултал нь хайрласан, гэхдээ хайрандаа сохроогүй ухаантай бүсгүй санагдсан. Таны хувьд Гэрэлээг хэрхэн тодорхойлох вэ?

                -Миний хувьд хайрандаа үнэнч эмэгтэй, хайрынхаа дундаас төрсөн үрийнхээ төлөө өөрийгөө золиосолж яваа эмэгтэй гэж бодож, дотоод сэтгэл зүйг нь гаргахыг хичээсэн.

-Таны ажилласан анхны дүр ямар уран бүтээлийнх байсан бэ?

                -Хамгийн анх найруулагч Л.Таванбаярын зохиол, UBS телевизийн бүрэн хэмжээний киноны Нандины дүр дээр ажилласан. Тайзны уран бүтээлийн хувьд “Шинэ үе” продакшны намар цагийн инээдмийн шоу тоглолтод оролцож байсан. Драмын жүжгээр хамгийн анхны бүтээл бол "Хайрыг хайрла" жүжгийн Гэрэлээгийн дүр байлаа.

-“Арслан хүлэгт баатар” жүжигт ажиллаж байгаа юм билээ. Хүүхдийн жүжигт ажиллах ямар байна. Танаас огт өөр мэдрэмж шаардаж байгаа байх?

                -Хүүхдийг бид хуурч, аргалах боломжгүй хамгийн үнэнч үзэгчид байдаг. Тийм болохоор жүжигчид бид илүү их анхаарал, мэдрэмж байх хэрэгтэй. Хүүхдийн нүд үнэн учраас бид тэднийг өөрсдөдөө итгүүлж тэдний ертөнцөөр аялуулахын тулд жүжигчдээс илүү их ур чадвар, хариуцлага шаарддаг.

-Хүүхэд, залуучуудын театрт яагаад нэгдсэн бэ. Ер нь залуу уран бүтээлчид ажиллаж байгаа санагдсан. Багийнхныхаа талаар ярихгүй юу?

                -Хүүхэд, залуучуудын очих дуртай газар 27 жилийн дараа дахин нээгдлээ. Түүхэн театр шүү дээ. Олон сайхан алдартнууд ажиллаж, олон шилдэг бүтээлүүдээрээ Улаанбаатар хотынхоо хүүхэд, залуучуудыг соён гэгээрүүлж байсан. Ийм театрыг үргэлжлүүлэн намтрыг нь бичилцэж, үйл ажиллагааг нь цааш үргэлжлүүлж, сайхан уран бүтээлүүд хийх үүрэг залуу уран бүтээлчид бидэнд ирсэн. Бид үүргээ сайн биелүүлэхийн тулд хичээнгүйлэн ажиллаж байна.

-Ер нь тайзны уран бүтээлчээр ажиллах сонирхолтой юу. Юу нь таны сэтгэлийг энэ чиглэл рүү татах болсон юм бэ?

                -Тайз бол жүжигчнээс их ур чадвар шаардсан, үзэгчидтэй шууд харилцдаг учраас тэр амьд харилцааны үед авч байгаа мэдрэмж үнэхээр сайхан. Тоглолтоос тоглолтын хооронд жүжигчин хүн алдаа оноогоо засаж, өсөж хөгжих бүрэн боломжийг тайз олгодог юм шиг санагддаг.

-Уран бүтээлчийн хувьд үзэгчдийг “Хайрыг хайрла” жүжгээс юуг ойлгоосой гэж хүсэж байна?

                -Одоогийн нийгэмд тулгараад байгаа асуудал бол залуу гэр бүлүүдийн салалт билээ. Гэр бүлээ бүтэн авч үлдэх ухаан заримдаа дутаад байх шиг санагдаж байгаа. Хайранд ч ухаан хэрэгтэй шүү дээ. “Хайрыг хайрла” жүжгээс хайрыг талаар олон зүйл сурах байх. “Хайрыг хайрла” жүжгийг залуу гэр бүлүүд хамтдаа ирж үзээсэй гэж хүсэж байна.

- Таны хувьд  хайрыг хэрхэн хайрладаг вэ. Гэр бүл харилцаа юун дээр тогтдог юм шиг санагддаг вэ?

                -Гэр бүлийн харилцаа бол бие биедээ итгэх итгэл дээр тогтдог. Хайр бол цаг хугацаа өнгөрөх тусам илүү их нэг нэгнийгээ таньж мэдсэнээр үргэлжилдэг гэж боддог.

-Яагаад жүжигчин болохоор шийдсэн бэ. Юу нь таны сонирхлыг татсан юм бэ?

                -Жүжигчний мэргэжлийн сайхан нь олон хүмүүсийн алга ташилт, урмын үгсээр тэтгэгдэж, шүүмжээр хурцлагдаж амьдардаг. Нэг үгээр хэлбэл гэгээлэг сайхан мэргэжил гэж боддог доо.

-Танд өөрийгөө сорихыг хүссэн дүр бий юү. Яагаад?

                - Оногдож байгаа дүр бүр жүжигчин хүний хувьд сорилт байдаг. Тийм болохоор ямар ч дүр оногдсон өөрийгөө сорьж ажиллахыг хүсдэг.

-Таны дараагийн зорилго, төлөвлөгөө юу вэ?

              -Театр маань хөшгөө нээгээд удаагүй байгаа учраас олон уран бүтээл дээр ажиллаж, театр маань танхим дүүрэн үзэгчтэй он жилүүд бидэн ирээсэй гэж хүсэж байна. Хүүхэд, залуучуудын театрын уран бүтээлчид үргэлж та бүхний өмнө шинэ уран бүтээлүүдээрээ бэлэг барихыг зорин ажиллаж байна. 

-Ярилцлага өгсөн танд баярлалаа.

             -Надтай ярилцсан танай хамт олонд ажлын амжилт хүсье баярлалаа.