“...Миний амжилт бүрийн ард хань минь байдаг аа. Хүн л юм чинь нумаа үүрээд гэрээсээ гарахдаа улсын наадмын түрүү “горьдож”, санаархаж, мөрөөдөж мордсон. Би анх удаа төрийн наадмын алтан зурхайд өөрийгөө сорьж, улсын мэргэн харваач боллоо. Зүүд ч юм шиг санагдаж, итгэх аргагүй сайхан байна” гэж ярих залууг Дамиранжавын Алтангэрэл гэдэг. Тэр улсын баяр наадамд 30 сум харваснаас 28-ыг нь баараггүй онож, урианхай сурын харваанд түрүүлсэн залуухан аварга. Баруун хязгаараас Улсын мэргэн харваач “төрж” ховдчууд, баян-өлгийчүүд Үндэсний баяр наадмыг өнгөтэй эхлүүллээ. Уншигч та бүхэнд урианхай сурын харваанд түрүүлж, улсын мэргэн цол хүртсэн Баян-Өлгий аймгийн Булган сумын уугуул, Ховд аймгийн Мянгад сумын харьяат, “Алтайн шонхор” багийн харваач Д.Алтангэрэлийн ярилцлагыг хүргэж байна.