Цахим орчинд олны анхаарлыг ихээр татаад байгаа Д.Наранбаатар, Х.Одхүү нарын өрсөлдөөн болох хугацаа удахгүй олон нийтэд зарлагдах аж. Тэгвэл уг тулаан гурван төрлөөр буюу үндэсний бөх, холимог тулаан, жүдо бөх гэсэн ангилалд явагдах гэнэ. Өрсөлдөгчид цахим орчин дахь албан ёсны хуудсаараа удаа дараа мэдэгдэл хийж, бэлтгэл сургуулилалтын явцаа танилцуулаад байгаа билээ. Д.Наранбаатар хоёр хоногийн өмнө өрсөлдөгч Х.Одхүүд хандаж “Намайг яагаад өдөөд байна. Би өдөр тутам бэлтгэлтэй байдаг юм шүү” гэж хэлээд амжсан. Тулааны бэлтгэл хэрхэн өрнөж байгаа талаар Д.Наранбаатартай ярилцлаа. 

-Х.Одхүүг тулаанд дуудах шалтгаан юу байсан бэ? 

       -Тулаан хийх болсон шалтгаан нь цахим орчин дахь маргаанаас үүдсэн. Одко намайг өдсөн маягаар мессэж бичиж, маргаан эхлүүлсэн. Тэгэхээр нь би өөрийн цахим хуудсаараа мэдэгдэл хийж, ямар ч тулаанд бэлэн гэдгээ илэрхийлсэн л дээ. Харин анх үндэсний бөхөөр өрсөлдөхөөр тохирсон ч гурван төрлөөр өрсөлдөхөөр шийдээд байна. 

-Цахим орчинд бэлтгэл хийж буй бичлэгээ оруулсан байсан. Бэлтгэл хэрхэн хангагдаж байна вэ?

       -Тулааны тов гараагүй байгаа ч бэлтгэл сургуулилалтаа аль хэдийнэ эхэлсэн. Хөвсгөл аймгийнхаа ах нартай хамт үндэсний бөх, жүдогийн бэлтгэлээ үргэлжлүүлж байна. Өдөр бүр гүйж, сунайж байгаа.

-Өрсөлдөөн гурван төрлөөр явагдана гэж цахим орчинд зарласан байсан. Аль төрлийн спортоор өрсөлдөх вэ?  

        -Бид хоёр үндэсний бөх, жүдо, холимог тулаан гэсэн гурван төрлөөр өрсөлдөнө. Нэгэнт маргаанаа шийдвэрлэх гэж байгаа юм чинь өрсөлдөөний талбар дээр гурван төрлөөр эр хүн шиг учраа ололцоно. 

-Та урьд нь холимог тулаанаар хичээллэж байв уу? 

        -Би холимог тулааны талаар мэднэ. Саяхан Улаанбаатар хот руу очиж, мэргэжлийн тамирчидтай уулзалт хийж, зөвлөгөө авсан. Энэ төрлийн тулаан жин тэнцүү байх ёстой ч жин харгалзахгүй үзэлцэнэ.  

-Цахим хуудасны дагагчид нь таныг ялна гэдэгт итгэлтэй байх шиг харагдсан. Х.Одхүүг ялна гэдэгт хэр их итгэлтэй байгаа вэ? 

       -Миний бэлтгэл сургуулилалт сайн байгаа. Ард түмэн надад итгэж дэмжиж байгааг би харсан.Тийм болохоор би өөрийгөө ялна гэдэгт итгэлтэй байна. Уг нь зүгээр л маргалдсан юм. Гэтэл бүр тулаан хийх дээрээ тулчихлаа. Нэгэнт л ийм зүйл болсон юм чинь эр хүн шиг үзэлцэнэ. 

-Тулалдаан хэдэн төгрөгийн бооцоотой явагдах вэ? 

       -Чадвал 10 сая, чадахгүй бол таван сая төгрөгийн бооцоотой өрсөлдөнө гэж бодож байна. Бооцооны мөнгийг нутгийн ах дүү нарын дэмжлэгтэйгээр босгож л байгаа. Шударга өрсөлдөнө. Эр хүн хэлсэндээ, эмээлт морь харайсандаа гэдэг шүү дээ. 

-Х.Одхүүгээс ялгарах бэлтгэл сургуулилалтын нууц бий юу? 

         -Би өдөр бүр мод, чулуугаа өргөж, түлээ, аргалаа зөөсөөр нэмэлт бэлтгэл хийж байна. Жишээ нь, өглөө болгон гар дээр сунайж, гүйдэг. Би Х.Одхүүгээс есөн насаар ах л даа. Гэхдээ нас, жин харгалзахгүй эр хүн шиг өрсөлдөнө гэж бодож байгаа. Тэр өдрийн тэнгэр мэднэ гэдэг шиг тэмцээн дээр хэн ялахыг таашгүй. Ялсан ч, ялагдсан ч сайхан эр хүмүүс байна даа. Үндэсний бөхөөрөө л гол нь сайхан өрсөлдөнө гэж бодож байна. Би хэчнээн их хөлс дуслуулна , төдий чинээ амжилтад хүрнэ гэж боддог. 

-Баярлалаа, амжилт хүсье. 

-Баярлалаа.