Израиль Улс амны хаалтыг хэрэглээнээс халж, коронавирусийг ялан дийлснээ зарлалаа. Тодруулбал, тус улсын Эрүүл мэндийн сайд Юли Эдельштейн "Ням гарагаас иргэд гадуур явахдаа амны хаалт хэрэглэх шаардлагагүй" хэмээн мэдэгдсэн юм. Гэхдээ тодорхой заасан газруудад амны хаалт хэрэглэх заалтыг хэвээр үлдээжээ. 

Хамгийн чухал нь Эрүүл мэндийн сайд Юли Эдельштейн улс орон даяар вакцинжуулалтыг амжилттай зохион байгуулснаа мэдэгдсэн нь энэ мэдээг жилийн турш амны хаалт хэрэглэсэн израильчуудыг баярлуулсан юм. 

Өнгөрсөн нэгдүгээр сарын дунд үед тус улсад коронавирусийн халдвар оргил цэгтээ хүрч өдөрт дунджаар 8000 гаруй хүнээс коронавирусийн халдвар илэрч байв. Тэгвэл дөрөвдүгээр сарын 17-ны өдөр тус улсад коронавирусийн халдвар илрээгүй юм.

Тийм хэдий ч Их Британи Улсын мэргэжилтнүүд энэ үед илүү болгоомжтой байхыг Израиль Улсад анхааруулж байна.

Коронавирусийг вакцины тусламжтай ялан дийлжээ

      Тус улсад коронавирусийн гурав дахь давлагаа эхлэхэд иргэдээ вакцинжуулах ажлыг эрчимжүүлж эхэлжээ. Хүн амынхаа талаас илүү хувийг вакцинжуулж чадсаны үр дүнд коронавирусийн халдвар эрчимтэй буурсан байна. Хэдий насанд хүрээгүй хүүхдийг вакцинжуулалтад хамруулаагүй ч халдварын тархалт бүх насныханд буурсан байна. Мөн арга хэмжээ зохион байгуулах, бусад үйл ажиллагааг нь зогсоогоод байсан байгууллагуудыг нээх, ирэх сараас хилээ нээж вакцин хийлгэсэн иргэдийг нэвтрүүлэх шийдвэр гаргасан байна. Израильчууд иргэдийнхээ ихэнх хувийг вакцинжуулалтад хамруулснаар олон хүн цугларсан ч тархах магадлал бага хэмээн үзжээ. Коронавирусийн халдвар авсан хүн дунджаар 3-4 хүнд халдвар тараадаг гэж үздэг. Тэгвэл нийт иргэдийн ихэнх хувийг дархлаажуулснаар нэг хүн нэг хүнд л халдвар халдаах эрсдэлтэй болох аж. Тиймээс халдвар тархсаар байх хэдий ч олноор өвчлөл магадлал багасжээ.

      Израиль Улс хүн амынхаа 60-аас дээш хувь буюу хүн амын 5.3 сая иргэнийг коронавирусийн эсрэг Пфайзер вакцины эхний тунд хамруулсан бол 54 хувь буюу 4.9 сая гаруй хүн хоёр дахь тундаа хамрагджээ. Мөн коронавирусийн халдвараар авч дархлал тогтсон 830 гаруй мянган хүнийг хамаатуулж үзэж нийт хүн амын 68-70 хувьд коронавирусийн дархлал тогтсон хэмээн зарлажээ. Ийнхүү хүн амынхаа хамгийн их хувийг вакцинжуулсан орон болжээ. Гэхдээ вакцин коронавирусээс 100 хувь хамгаалах боломжгүй бөгөөд мэргэжилтнүүд вакцин хийлгэсэн ч вирусийн халдвар тээгч болох эсэх талаар судалгаа одоогоор гараагүй байна.

Израиль Улсад цар тахал эхэлснээс хойш 837 мянган хүн коронавирусийн халдвар авч 6331 хүн нас барсан байна.