Төв аймгийн Эрдэнэ суманд хатуу хөл хорио тогтоожээ. Тодруулбал, тус сумын Өгөөмөр багт байрлах Аржанчивлан сувиллын газраас коронавирусийн халдвар илэрсэн байна. Гуравдугаар сарын 15-нд Улаанбаатар хотоос очиж амарсан иргэний хоёр дахь PCR шинжилгээнээс халдвар илэрсэн тул сувиллын 35 ажилтныг шинжилгээнд хамруулахад зургаан хүнээс халдвар илэрчээ.

Иймд Төв аймгийн Эрдэнэ сумын Засаг дарга гуравдугаар сарын 22-ны өдрийг дуустал хатуу хөл хорио тогтоохоор болсон байна. Одоогийн байдлаар сумаас орох, гарах хөдөлгөөнийг бүрэн хязгаарлаж, хүнсний дэлгүүрүүдийн ажиллах цагийг 11:00-17:00 байхаар тогтоод байгаа аж.