Коронавирусийн халдвар авсан иргэний тоо 24 цагт 170 хүнээр нэмэгдэв. Үүний хоёр нь Төв аймагт бүртгэгдсэн бөгөөд Баянгол дүүргийн оршин суугч шинжилгээнийхээ хариуг хүлээлгүй Төв аймгийн Баянчандмань суманд ажил явдалд оролцохоор очжээ.

Эрүүл мэндийн яамны хэвлэлийн ажилтан Б.Ууганбаяр энэ талаар "Тухайн иргэнтэй ойрын хавьтал болсон иргэдийг тусгаарлах ажлыг зохион байгуулж байгаа. Баянчандмань сумаас халдварын өвчлөл бүртгэгдээгүй. Баянгол дүүргийн иргэн учраас Улаанбаатар хотод бүртгэгдсэн.Тухайн иргэнээс коронавирусийн халдварын шинж тэмдэг илэрсэн тул ХӨСҮТ-ийн тандалт судалгааны баг очиж авсан.  Шинжилгээний хариугаа хүлээлгүй орон нутаг руу зорчсон хэд хэдэн тохиолдол гарлаа. Иргэд яаралтай ажлаар хөдөө орон нутгийг зорихдоо заавал шинжилгээ өгч, хариуг нь хүлээж байгаад, хариу гарсны дараа хөдөлгөөнд оролцож байхыг дахин хүсье" гэв.