-Коронавирусийн халдвар нь эдгэрч, нас барсан иргэн уушгины хавсарсан эмгэгтэй байсан-

Эрүүл мэндийн яам болон ХӨСҮТ-өөс коронавирусийн нөхцөл байдлын талаарх мэдээллийг өгөх үеэр ЭМЯ-ны Дархлаажуулалтын албаны дарга О.Дашпагма, ХӨСҮТ-ийн Халдварт өвчний тандалт, судалгааны албаны дарга Ж.Байгалмаа нар сэтгүүлчдийн асуултад хариуллаа.

-Онцгой нөхцөлд ажиллаж байгаа хүмүүсийн хэдэн хувь нь вакцинжуулалтад хамрагдаад байна вэ. Мөн иргэдийг хэзээнээс дархлаажуулж эхлэх вэ?

-Эхний ээлжийн вакцинаар Улаанбаатар хотод байгаа эрүүл мэндийн байгууллагын ажилтан, эмч, хариу арга хэмжээний багийн алба хаагч нарыг дархлаажуулж байгаа. Ялангуяа нэн тэргүүнд хариу арга хэмжээний багт ажиллаж байгаа хүмүүсийг эрэмбэлсний дагуу вакцинжуулалтад хамруулсан. Одоогоор нийт 11120 ажилтныг дархлаажуулаад байгаа. Энэ үйл ажиллагаагаа өргөжүүлээд зорилтот бүлгийн 59-69 насны иргэдээ энэ долоо хоногоос вакцинжуулахаар төлөвлөөд байна.

-Өрхийн эрүүл мэндийн төвүүдийг яагаад ажиллуулахгүй байна вэ. Ямар шат дарааллаар, яаж вакцинжуулах мэдээллийг нээлттэй болгох боломжтой юу?

-Өрхийн эрүүл мэндийн төвийн эмч, мэргэжилтнүүд хэвийн ажиллаж байгаа. Гэхдээ  цар тахлын нөхцөл байдалтай холбогдуулан эрүүл мэндийн зарим төв дээр дархлаажуулалтын цэг байгуулсан.

Иргэдээс  удаашралтай байна гэсэн гомдол ирж байгаа.  Тухайн иргэнийг дархлаажуулахаас өмнө эрүүл мэндийн үзлэгт хамруулж байгаа учир тодорхой хугацаа шаардаж байна.

-Хөдөө орон нутаг руугаа явах шаардлагатай гурваас дээш насны хүүхдүүд заавал PCR шинжилгээ өгөх ёстой юу?

-Хөдөө орон нутаг руу зорчих хөдөлгөөнийг Шадар сайд С.Амарсайханы баталсан 21 тоот түр журмаар зохицуулж байгаа. Энэ журамд зааснаар нэг гэр бүлийн нэг гишүүн PCR шинжилгээ өгсөн байх ёстой. Тийм учраас сургууль руугаа явах гэж байгаа гурваас дээш насны хүүхдийг заавал шинжилгээ өгөх ёстой гэж шаардахгүй.

-Одоо байгаа вакцинаа эхний ээлжинд бүгдийг нь нэг тунгаар тарих уу. Эсвэл хоёр хувааж, хоёр тунгаар тарих уу. Энэ талаар дэлгэрэнгүй мэдээлэл өгнө үү?

-Вакциныг зааврын дагуу хоёр тун хийх шаардлагатай. Нийт 150 мянган тун буюу хоёр тунгаар 75 мянга орчим хүнийг дархлаажуулах вакцин байгаа гэсэн үг. Өөрөөр хэлбэл, эхний ээлжинд нэг тунгаар 150 мянган хүний дархлаажуулахгүйгээр хоёр тунгаар 75 мянга орчим хүнийг дархлаажуулна.

-Вакцинжуулалтын 22 цэгт хэчнээн эмч ажиллаж байгаа вэ?

-Дүүргийн Эрүүл мэндийн төвүүд дээр 22 нэгжийн 31 баг буюу 220 гаруй эмч, мэргжилтэн ажиллаж байгаа. Үүнээс гадна лавлагааны төвүүд дээр цэг байршуулж байгаа бөгөөд 10 орчим багийн 80 гаруй эмч, мэргэжилтэн ажиллаж байна. Нийслэлийн хэмжээнд нийт 31 багийн 300 гаруй эмч,мэргэжилтэн вакцинжуулалтын ажил хийж байна. Цаашид өрхийн болоод бусад эмч, мэргэжилтнүүд вакцинжуулалт хийнэ.

-Хаанаас халдвар авсан нь тодорхойгүй олон тохиолдол илэрч байна. Халдвар авсан нийт иргэдийн хэдэн хувь нь тусгаарлалтад байхдаа, хэдэн хувь нь шинээр илэрч байгаа вэ?

-Өнөөдрийн байдлаар бүртгэгдсэн 32 тохиолдлоос 23 нь өмнө нь батлагдсан хүний ойрын хавьтлаар илэрсэн. Найм нь “Нэг хаалга-Нэг шинжилгээ” нэгдсэн арга хэмжээнээс илэрлээд буй. Харин  нэг хүний халдварын голомтыг тодорхойлоогүй байна. “Нэг хаалга- Нэг шинжилгээ” нэгдсэн арга хэмжээний хүрээнд 219 тохиолдлыг илрүүлж, тусгаарлах, эмчлэх арга хэмжээ авч байгаа.

-Манай улс Дархлаажуулалтын хуультай цөөн орны нэг. Энэ хуулийн дагуу ДЭМБ-аас баталгаажуулсан, олон улсад ашиглах зөвшөөрөлтэй вакцинаар хүн амаа дархлаажуулах ёстой. Гэтэл ДЭМБ-аас бүртгэгдээгүй Спутник-V, Синофарм үйлдвэрийн Вероселл вакциныг эмийн бүртгэлд бүртгэсэн учраас хүн амаа дархлаажуулна гэж мэдэгдэж байгаа нь ямар учиртай вэ. Энэ талаарх хууль, эрх зүйн ямар зохицуулалт байгаа вэ?

-Дархлаажуулалтын тухай хуулинд вакцин болоод био бэлдмэлийг олон улсад зөвшөөрөгдсөн тохиолдолд хүн амаа дархлаажуулна гэж заасан. Одоогоор коронавирусийн эсрэг АстраЗенека буюу олон улсад зөвшөөрөгдсөн вакцинаар хүн амаа дархлаажуулж байна. Эдгээр вакцин био бэлдмэлүүд Дархлаажуулалтын тухай хууль, Эм эмнэлгийн хэрэгслийн тухай хууль болон бусад хуулийн зохицуулалтаар Монгол Улсад хүлээн зөвшөөрөгдөнө.

-Коронавирусээр өвчилж, ХӨСҮТ-д 14 хоног эмчлэгдээд гарсан 67 настай иргэн нас барсан тухай мэдээлэл гараад байгаа. Энэ үнэн үү?  

-Энэ иргэн ХӨСҮТ-д коронавирусийн халдвараар эмчлэгдээд гарсан нь үнэн. Үүнийхээ дараа УНТЭ рүү уушгины хавсарсан эмгэгээр шилжиж, эмчилгээгээ хийлгээд гэртээ очсон. Гэртээ очоод юуны улмаас нас барсан талаар бид одоогоор мэдэхгүй байна.