УОК болон Засгийн газрын шийдвэрээр хоёрдугаар сарын 11-22-ныг хүртэл 10 хоногийн хугацаатайгаар бүх нийтийн бэлэн байдлын зэрэгт шилжүүлж, хатуу хөл хорио тогтоосон. Энэ хугацаанд үйл ажиллагаа нь зөвшөөрөгдсөн 14 салбарын ажилчид ажлын тодорхойлолт, үнэмлэхээ цагдаагийн алба хаагчид үзүүлэн хувийн тээврийн хэрэгсэл болон нийтийн тээврээр хөдөлгөөнд оролцож байгаа. Тэгвэл гурав хоногийн дараа буюу хоёрдугаар 22-нд хөл хорионы дэглэмийг цуцалж, энгийн амьдралын хэв маягт шилжинэ. Энэ талаар Засгийн газрын хэвлэл мэдээллийн албаны дарга Ц.Ганзориг “Хоёрдугаар сарын 23-нд Улаанбаатар хотын 411 мянган өрхийн PCR шинжилгээний нэгдсэн хариу гарна. Тэр хүртэл эрсдэлтэй хөдөлгөөн битгий хийгээрэй гэж хүсье. Учир юу гэвэл далд байгаа халдварыг илрүүлж, эцсийн халдваргүйжүүлэлт хийх ажлыг мэргэжлийн багийнхан 12 хоногийн хугацаанд зохион байгуулна. Иймд иргэд та бүхэн гэртээ байж, хоёрдугаар сарын 23-наас халдвар хамгааллын дэглэмээ сайтар баримталж эгэл амьдралын хэв маягт орох бэлтгэлээ хангахыг хүсье” хэмээн ярилаа.

Хөл хорио цуцалсан өдрөөс хойш иргэд QR код уншуулах, 1.5-2 метрийн зай барих, гараа ариутгах гэсэн халдвар хамгааллын дэглэмийг баримтална. Мөн PCR шинжилгээний бичиг шаардахгүй

Түүнчлэн гурав дахь удаагаа хөл хорио тогтоосон өдрөөс өчигдөр 14:00 цаг хүртэл нийтийн тээврийн хэрэгслээр 32705 иргэн зорчжээ. Үүний 32 хувь нь ахмад настан, 33 хувь нь үйл ажиллагаа нь зөвшөөрөгдсөн 14 салбарын ажилтан, 2.9 хувь нь шалгагч нар, 7.2 хувь буюу 2000 гаруй иргэн ямар нэгэн тодорхой зорилгогүй иргэн нийтийн тээврээр үйлчлүүлсэн байна.