ЭМЯ-наас цаг үеийн нөхцөл байдлын талаар мэдээлэл хийж байна. Мэдээллийн үеэр ГХЯ-ны Консулын газрын дарга Л.Мөнхтүшиг “Нэгдүгээр сард мэдээлсэн тусгай үүргийн нислэгийн мэдээлэлд энэ сард нийт дөрвөн тусгай үүргийн нислэг төлөвлөсөн. Гэвч нэмэлтээр гурван тусгай үүргийн нислэг зохион байгуулж, нийт долоон нислэг хийхээр болсон. Гадаадаас ирсэн иргэдийн тусгаарлалтын байр болон хугацааг хурдан зохицуулснаар нэмэлтээр тусгай үүргийн нислэг хийх боломжтой байна” хэмээсэн юм.

Өнгөрсөн 24 цагийн хугацаанд “Нэг хаалга-Нэг шинжилгээ”-ний хүрээнд болон ХӨСҮТ-д тусгаарлалт, ажиглалтад байсан нийт 49 хүнээс коронавирусийн халдвар илэрчээ. Улмаар улсын хэмжээнд нийт батлагдсан тохиолдол 2493 болж, үүнээс 1802 нь эдгэрсэн. 678 хүн эмчлүүлж байгаагаас маш хүнд нэг, хүнд долоон хүн байгаа юм.