Коронавирусийн халдвартай иргэдийн 72 хувь нь эдгэрч, эмнэлгээс гарчээ. Одоогийн байдлаар 678 хүн эмчлэгдэж байгаа аж. Мөн коронавирусийн халдвараар дахин нэг хүн нас баржээ.

Энэ талаар ХӨСҮТ-ийн Тандалт, судалгааны албаны дарга А.Амбасэлмаа “ХӨСҮТ-д эмчлүүлж байсан маш хүнд нэг хүн нас барлаа. Энэ хүн нь хоёрдугаар сарын 14-нд коронавирусйн халдвар авсан нь батлагдаж, ХӨСҮТ-д хэвтсэн. Биеийн байдал нь маш хүнд байж байгаад хоёрдугаар сарын 17-ны 12:56 цагт нас барлаа. Талийгаач нь хавсарсан, үсэрхийлсэн хавдартай, хавдрын хордлого, уураг дутагдал, тураал, олон эрхтний үйл ажиллагааны алдагдлаар нас барсан. Онош нь ходоод, бүдүүн гэдэсний хожуу үеийн хавдар, элэг, тунгалагийн булчирхайн үсэрхийлсэн хавдар, коронавирусийн халдвар хүндэвтэр гэж гарсан байсан ” гэлээ.