ЭМЯ-наас цаг үеийн нөхцөл байдлын талаар мэдээлэл хийж байна. Өнгөрсөн 24 цагийн хугацаанд “Нэг хаалга-Нэг шинжилгээ”-ний хүрээнд болон ХӨСҮТ-д тусгаарлалт, ажиглалтад байсан нийт 49 хүнээс коронавирусийн халдвар илэрчээ. Улмаар улсын хэмжээнд нийт батлагдсан тохиолдол 2493 болж, үүнээс 1802 нь эдгэрсэн. 678 хүн эмчлүүлж байгаагаас маш хүнд нэг, хүнд долоон хүн байгаа юм.

Уг мэдээллийн үеэр Засгийн газрын Хэвлэл мэдээлэл, олон нийттэй харилцах хэлтсийн дарга Ц.Ганзориг “Сүүлийн өдрүүдэд иргэд олноор гадуур зорчих эрсдэлтэй байна. Мөн тусгай үйлчилгээний нийтийн тээврээр үйлчлүүлж буй иргэд дараалал үүсгэн, халдвар хамгааллын дэглэмээ мөрдөх боломжгүй байвал нэмэлтээр 60 тусгай үйлчилгээний нийтийн тээврийг явуулж болно” гэсэн юм.