ЭМЯ-наас цаг үеийн нөхцөл байдлын талаар мэдээлэл хийж байна. Өнгөрсөн 24 цагийн хугацаанд “Нэг хаалга-Нэг шинжилгээ”-ний хүрээнд болон ХӨСҮТ-д тусгаарлалт, ажиглалтад байсан нийт 49 хүнээс коронавирусийн халдвар илэрчээ. Улмаар улсын хэмжээнд нийт батлагдсан тохиолдол 2493 болж, үүнээс 1802 нь эдгэрсэн. 678 хүн эмчлүүлж байгаагаас маш хүнд нэг, хүнд долоон хүн байгаа юм.

Уг мэдээллийн үеэр Засгийн газрын Хэвлэл мэдээлэл, олон нийттэй харилцах хэлтсийн дарга Ц.Ганзориг “Өчигдөр Баянгол дүүрэгт 21 суурин цэг, 97 явуулын баг ажиллаж, нийт 25 хорооны 36046 өрхөөс шинжилгээ авсан. Харин өнөөдөр “Нэг хаалга-Нэг шинжилгээ” Хан-Уул дүүрэгт төвлөрч ажиллах бөгөөд гурван суурин баг, 127 явуулын баг тус дүүргийн 18 хорооны 32 мянган өрхөөс шинжилгээ авна” гэв.

Бүх нийтийн бэлэн байдлын үеэр “Нэг хаалга-Нэг шинжилгээ” дүүрэг тус бүрд төвлөрч ажиллаж буй бөгөөд өчигдөр Баянгол дүүрэг, өнөөдөр Хан-Уул дүүрэгт төвлөрч ажиллаж байна. Тус тандалт, илрүүлгийн шинжилгээний хүрээнд,

-Хоёрдугаар сарын 19-нд Чингэлтэй дүүрэгт,

-Хоёрдугаар сарын 20-нд Сүхбаатар дүүрэгт,

-Хоёрдугаар сарын 21-22-ны өдрүүдэд Баянзүрх дүүрэгт тус тус төвлөрч ажиллах юм. Мөн захын дүүргүүд буюу Багануур, Багахангай, Налайх дүүргүүдэд хоёрдугаар сарын 17-19 хооронд “Нэг хаалга-Нэг шинжилгээ” ажиллаж байна.